◄ Laisse CCCLXXXVI | Laisse CCCLXXXVII | Laisse CCCLXXXVIII ► |
CCCLXXXVII[1]
La ou li quens Rollant son oliphant retoine :
O lui cevaucerent tantes noble persone
Qe por honor conquere ont durez mainte poine ;
O lour ne porterent pains ni vins ni avoine.
E Bernars treit de dos sa sclavine Esclavoine
E le capius de cief, dont senbloit un canoine ;
Au plus tost qe il puet a vestue la broine,
L’eume s’alace, et cent le brant de Macedoine,
E monte au bon destrer qe Tiris li amoine,
Le escüer Rollant qe pués fu duc d’Ardoine.
Vers Noble s’adrecerent, pres le poi de Jeroine,
Tasans et enbruncez, qe nuz mot non i soine.
Or les condue Diex et sante Madeloine
E cil buen saint par cui il sont en tiel estroine !