| ◄ Laisse CCXII | Laisse CCXIII | Laisse CCXIV ► |
Pris en meinent Paiens li quens Estous ;
Dedenz la tor, enz le fond tenebrous,
La le mistrent les culvers envious.
Malgeris entre en li stor perilous ;
Sa gient conforte : « Barons, qe fetes vous ?
« Tué, trenchié ces François orguellous
« Qe nos ont mort, tant par sunt engignous,
« Le niés Marsille, Feragu l’amorous,
« E tant des autres, dont sumes dolerous.
« Oi vengieruns les aigles sor les lous. »
Lors tient l’espee, s’ala ferir Anfous
Qe molt estoit fier et chevalarous ;
Tot le detranche deci qe as denz desous.
Lor sunt Paien del ferir afarous ;
Nos Crestïens en funt molt angosous.
Ec vos poingant li vasal corajous,
C’est le niés Charles, sor noir Amoravous,
Palmoiant lance, a pué non a feit dous ;
Sa insaigne porte Hues li quens de Blous.
Encué seront .cc. Pampelonous
De retorner a meison sofreitous.