◄ Laisse CXCVII | Laisse CXCVIII | Laisse CXCIX ► |
Le roy de Pampelune o sa gent mescreüe
Cevauce vers la porte por mi la mastre rue.
La descend dou ceval, sa gent fest ester mue
E monte sor la tor lez la porte volsue
E voit la gent Trepyn qi ancor ni est moüe
E ni avoient ne buef ne vache retenue,
Ançeis le laixent pastre aval l’erbe menue,
Sonent corn e busines e gran trombes bouçue.
Malçeris le regarde e la lor contenue ;
De la tor est desis sor sa selle vestue,
Pois a dit a ses homes : « Ceste gent est vencue. »
Senestors en apelle, prince de Landerue :
Cil fu son liges hom de sa reconeüe ;
« Ensireç vos », fait il, « tote une embatue ;
« Sor ces primer François feites une ferue.
« S’il aüsent vers vos bataile retenue,
« Deprés moi e mes homes vos serons en aiue. »
E le Paiens l’otroie, qe fierement s’argüe ;
Il en jura Machon, se cent François nen tue
Le jor, il ne se prise une pore sambue.
Pois fu cele parole molt chieremant vendue,
Por tant fu la menaçe de doutançe vestue.