◄ Laisse DCLXIV | Laisse DCLXV | Laisse DCLXVI ► |
Mais tut les autres piers menacent le partir ;
Ne quident qe Rolant deüst mais revenir.
L’uns barons aprés l’autre vont le congié querir ;
L’enperer ne le seit ne doner ne tolir ;
Lor reclama Rolant cun un agu sospir :
« Dous fiuz, se tu is mort, car me vien a oncir,
« E, se tu is vivant, vin ma plage garir,
« Que tantes fois me feit et jor e nuet morir.
« Rolant, or conois jé qe je feri le sir
« De mon guant par le vis, qi me fesoit servir ;
« Ne puis més dolant estre, ne sai fors de taisir.
— Sire », dit Oliver, « por c’est bien a guenchir
« La mauveisse ovre a feire avant le repantir ;
« Il me poise de vos e de moi le martir,
« Mais tel a feit la plage qe non puet estre mir.
« Ne quidés por ce mie qe je ver vos m’aïr,
« Tant qe jusque la mort ne vos voille obeïr
« Por le amor celui qi tant me feit languir ;
« Qui vos faudra, cil sui qi ne vos puet falir :
« Qui qe partent de l’ost, je sui au remanir ;
« Qui por vos fuie mort, por vos la veul sofrir.
« Mas fetes une ren, se vos vien a plesir :
« Pués qe ces vos barons ne vos volent seguir,
« Feites a l’endeman tut vos greiles bondir,
« Les pavailons destandre q’avïés feit qilir,
« E cescun vostre arnois cargier a bel loisir ;
« La reregarde veul avoir e sostenir,
« Pués retornons en France a dobler le martir.
— Oliver », dit le rois, « ce seroit da graïr,
« Qui veult, aler s’en puet, qe ci vuel definir
« Ains que por moi s’en fue le signal de l’anpir. »