◄ Laisse DCXX | Laisse DCXXI | Laisse DCXXII ► |
Il ne chevauchent gaire, puis q’il furent moü
D’iluech, q’il troverent des oucis plu e plu :
Un i an avoit deci qe ou braier porfandu.
« Segnor », ce dit Rolant, « ne puis plus estre mu :
« Ou cist coup furent feit por divine virtu,
« O voiremant nos somes entre jaians venu. »
A iceste parole sunt fors dou gaut insu ;
En une desertine furent puis enbatu,
Espinoise e mauvaise : n’i ont senter veü ;
N’i a cheval non soit en la ganbe feru.
A destre main avoit un grant forest ramu
Ech vos troi Seraçin, cescuns bien fervestu,
Si avoit cescun d’aus corant cheval crenu :
Cist furent robeor q’avoient combatu
La maison d’un prodome, voir qe Seraçins fu ;
Rober le voloient, s’erent quarante du.
Le prodome s’estoit si tres bien defendu,
E il e si sergiant q’il avoit avec lu,
Qu’il n’avoit li vint mort e les .xvii. pendu.
Cil troi s’en sunt fuïs, qi mout sunt irescu,
Qui vont jurant le ciel, la tere e mer fondu,
S’il trovassent Machon, Apolin e Chaü,
Si li cunvenra il estre dou lor tolu,
E se nul s’en ofant, mort ert e confondu.