◄ Laisse DCXXVIII | Laisse DCXXIX | Laisse DCXXX ► |
Si com a dit le duch li dui barons outrie ;
Belamant sunt asis sor l’erbete florie.
Un petit repusent, e pués ne tardent mie
Qu’il montent es chavas, e si ne font folie,
Car ancor ont regart de le gent d’Aumarie.
Rolant amont le poi a sa voie quilie,
E quant oit costoié dou tertre grant partie,
Entre dos grant montagnes vit une roche antie,
D’amont aval qeüe por veille ancesorie :
Une glixe i avoit por desus establie,
E la mason dejoste : se ele fust garnie
Solemant de .x. homes e de vin e de blie,
Ne la prendroit por forche li Lonbart de Pavie.
Le pont estoit levés e la porte serie.
Rolant s’est arestés e se mist en oïe,
Si oï un ermite qi cantoit la complie
A ce qe Diés li dont la parmanable vie.
Rolant, qant l’a oïs, de joie Diex mercie ;
Maintenant descendi dou noir de Barbarie.