◄ Laisse DLIII | Laisse DLIV | Laisse DLV ► |
Quant ha ce dit, si le court a ferir ;
Le duch Rolant vait le cols recuillir
En suens eschus a guisse d’eschremir.
Et cel i fiert par merveillous ahyr ;
Tot uns zaintels en a fait departir.
Dist le niés Karles : « Qui pora tant sofrir ? »
Ausi chum il le voit a l’autre cols venir,
A le retreite li vait le suens oufrir :
Le bras au Turs vient in l’espee zahir
Que de l’aubers fait la maille faillir ;
Le sang en fait par une plaie inssir.
Le cols fu tot insamble ; au ressaillir,
Sor le piés droit s’est alez retenir ;
Mist brant a punte chun senblant de colpir.
Cil semblant fist le Païns si esbaïr
Que non se ouse crouler ne descovrir.
De paors trait Pellias uns souspir,
Et pué ha dit, non s’an puet retenir :
« Mahomet sire, a qui me voy laidir !
« Se moi veïsse a uns gentils ome oncir,
« Soufrir poroie plus in pais le martyr. »