◄ Laisse DLIX | Laisse DLX | Laisse DLXI ► |
« Avez oï », ce dit Roullant, « noumer
« Decha la mer Karlemaigne au vis fer ?
— Oïl, par quoi ? » ce respont li Ascler.
— Cel roi de France », fait Rollant le gerer,
« Une suer ot, que douna a muiler
« Peppin le roi au duch Mille d’Angler ;
« Uns fils en ot, que l’ons fait appeler
« Rollant : jel sui, de Rome justiser
« Et chanppion et maitre tresorer.
« Sous mon choulor et par moi coroner
« Sunt in Espaigne cent mile civaler,
« Non ja uns soul desirans de torner
« Arere in France par reveoir sa per
« Tant que en Espaigne avra que conquister.
« O ceste spee, nel di pas por vanter,
« De Ferraguz fi caoir le danger,
« Ch’unques Nature non pora recovrer
« Nuls son pareil par Jesu reveller.
« Par quoi je soie venuz decha la mer ?
« De l’ouqueison ne me voil enchuser ;
« Trop avons zi atendus a pleider.
« Tu disiroies de Roullant atrover,
« Hor l’as de prés ; panse de toi garder :
« Mien esciant, il te fait grant mester. »
Chant cil l’oï, n’i a que espoanter ;
Par sun voloir, voisist estre in . . . . ;
N’oit teil doutance pué q’il nasqui de mer.
Non fist senblant, mais si respont arer :
« Se ce est voir, Rollant, bien pués jurer
« Molt grant soufraite avis de cunsiler
« Chant is venuz en ces regne estranger.
— Voir », dit Rollant, « bien tel savrai cunter. »
Adunc le vait fieremant asauter ;
Sor le defandre fist Pellias penser,
Char il voit bien molt i avra grant mester.