◄ Laisse DLXXVII | Laisse DLXXVIII | Laisse DLXXIX ► |
Sa pere de beauté non fu Pollisenan
Ni Elaine, por qui fu mort le roi Prian.
Plus savoit des estoille que nul ome mondan.
La roïne de Perse prent le roi par la man
« Sire », ce dit la dame, « a doner cunsoil san,
« Delivrés votre fille Lionés au deman.
— Dame », ce dit le roi, « trop en sumes luntan.
« Ja non pois noces faire si paseroit li an.
« Nos atendons de prés et guere et grant aan ;
« Cellu que romandra de bontés soveran
« Avra ma fille a per et part de mon teran ;
« Mais bien croi Lionés de ce le plus prozan. »
La puncele sorischun un vis onble et plan,
E sun pere le baise, que non l’amoit in van.
Pué s’an vait a sa chanbre avec sun zanberlan.
Uns eschrins fist ouvrir, que fu d’un nor eban,
Que de dras et d’arnois estoit garni e plan ;
Des roubes in a trait d’un velus Surian
A le guise intaillees dou regne Persian ;
Un sun druz apella, que avoit non Sardan :
« Amis, aprés maitin, avant le jor seran,
« Une roube et dos chauces a soler Cordoan
« Aporterez au lit dou milor païsan
« Ch’unques soi dellitast in spee n’in clavan,
« Et l’autre a mon fils ; pué li dirais certan
« Qu’il voient de trover un auberge alian,
« Char trop non voil laiser le feu aprés le fan. »