| ◄ Laisse VI | Laisse VII | Laisse VIII ► |
— Se Diex m’ait », fet Rollant, « qe ben parle Galés,
« Il et cescuns qi sunt d’altretel voluntés !
« Car qi dit son voloir non doit estre blasmés.
« Dan Gales, ge voil ben que une riens saciés,
« Que noz voz conoisomes, ne voz an corocés,
« Vos et vestres lignaje, et comant nos amés :
« L’onors vestre seignors ne amastes jamés.
« Mal ait qi vos fist duc ni de consoil privés,
« Quant en ses grant domaje vestre sir conseilés !
« De cui conoscez voz le bien que vos avés ?
« Da Deu et da Carlons : or les en mirités !
« Ores oit bien, ce croi, .x. ou nuef anz pasez
« Q’en periloz repois et plains de vanités
« Et vos et tot cestor sunt estez et regnés
« Et a deseriter les pobres orfanés ;
« Les criminaus pecez sunt sor vos amassés,
« Les armes et les cors de voz sunt engajés
« Au diables d’anfers : quant les rechatarés,
« S’a cist pont orendroit ne voz en empensés ?
« Et je di et consoil qe le primer soiés
« A entrer en Espagne, ne plus mot non parlés.
« Ne voz amerai mays par vestre malvaistés :
« Mielz valt sovant taisir q’estre trop averbés.
« Seignors barons », dist-il, « q’estes ci asemblés,
« Remembre voz la grant desloiautés
« Qe vos a feit Marsille des le tenz trapassés,
« Qe promis a cist roi, de soz Vïene al prés,
« Fealté et homaje, et menti son hom liés,
« Quant Girard le mena, l’orguelos deu Fratés,
« Por confondre et destruir vos et Cristinités.
« Se vos avois vis d’omes et conosanz soiez,
« Jamés cil grant oltraje oblïer non devés.
« Par lui ne fu manqise et de sa voluntés
« Qe ne fusez destruz, oncis et esilés.
« Or est venuç le terme et le pont arivés
« De venger Deus et vos. Ja sui je aprestés,
« Cun .xx. homes de la Glixe soudés,
« De estre primirans trestot entallentés.
« Si vos estes si feit com ja vos ai trovés,
« Pitit porois priser castel ni firmités
« Qe durer vos i puise, tant soit de murs fondés.
« Barons, se voz eüsse de mon dit agrevés,
« Pri voz qe dou meillors intre voz avisés. »
A cist mot s’est asis, loé et desloés.