Iconologie (Cesare Ripa, 1643)/I/Confiance
Confiance. XXVIII.
Il ſeroit difficile d’en faire vn Tableau plus naturel que celuy-cy, repreſentant vne Femme qui regarde fixement vn Nauire, & qui le ſouſtient des deux mains.
Comme la Confiance preſuppoſe la connoiſſance de quelque danger prochain, & le moyen de l’éuiter, qui ſont deux qualitez ſans leſquelles elle changeroit ſon eſtre & ſon nom. C’eſt à raiſon de cela qu’elle eſt peinte auec vn vaiſſeau entre ſes mains : Car bien que la Mer ſoit ſi à craindre, que le ſeul mouuement de ſes vagues eſpouuante l’homme ; ſi eſt-ce que nous voyons par eſpreue qu’à la faueur d’vn ſimple nauire, il oſe bien ſe fier à ce barbare Element, dont on ne ſçauroit s’imaginer la vaſte eſtenduë, & ne trembler pas, à moins que d’eſtre plus inſenſible que les eſcueils qui s’y treuuent. Cela fait dire au plus excellent des Poëtes Lyriques,
Qu’il falloit que celuy portât armé le ſein
De trois ramparts d’airain,
Qui le premier de tous ſur la Mer inconſtante
Mit ſa barque flottante.