Iconologie (Cesare Ripa, 1643)/I/Doute

La bibliothèque libre.
Sauter à la navigation Sauter à la recherche


Ripa - Iconologie - 1643 - p. 54 - doubte.jpg

Dovte. XLII.


ON la repreſente par vn ieune Garçon, qui marche dans les tenebres, tenant vn Baſton d’vne main, & de l’autre vne Lanterne.

Ce que l’on appelle Doute, est à proprement parler, vn embarras d’eſprit touchant ce qu’on ne ſçait pas, & de corps par conſequent, en matiere d’agir & de trauailler.

On la dépeint ieune, pource qu’en cét aage-là, le peu de connoiſſance que nous auons de la Verité, nous met dans l’incertitude de toutes choſes.

Le Baſton & la Lanterne ſont des symboles de l’Experience & de la Raiſon, par le moyen deſquelles celuy qui doute de ce qu’il doit faire, peut s’arreſter, s’il veut, ou paſſer outre à la faveur de ces deux guides.