Iconologie (Cesare Ripa, 1643)/I/Liberté
Liberté. LXXXVI.
A figure eſt celle d’vne Femme veſtuë de blanc,
ayant vn Sceptre en la main droite, vn Bonnet en
la gauche, & vn Chat prés d’elle.
Le Sceptre ſignifie l’Empire de la Liberté, qui ne le tient que de ſoy-meſme, eſtant comme elle eſt, vne abſoluë poſſeſſion d’eſprit, de corps, & de commoditez temporelles, qui nous incitent au bien par diuers moyens ; à ſauoir l’eſprit, par vne grace particuliere de Dieu, le corps, par l’aide de la Vertu, & la richeſſe, par la direction de la Prudence.
Elle eſt peinte auec vn Bonnet en main, d’autant que par vne ancienne couſtume, les Romains le faiſoient porter à celuy de leurs Eſclaues qu’ils vouloient affranchir, & le remettre en liberté, apres luy auoir razé les cheueux ; Ceremonie qui ſe faiſoit d’ordinaire dans le Temple de la Deeſſe Feronia.
L’on met vn Chat à ſes pieds, pource qu’il n’y a point d’animal qui aime tant la liberté que celuy-là, qui ne peut ſouffrir en aucune ſorte d’eſtre enfermé : à cauſe dequoy quelques peuples, & particulierement les Bourguignons, le portoient anciennement pour deuiſe en leurs enſeignes de guerre.
I’obmets, que parmy pluſieurs Medailles de la Liberté, il s’en trouue quelques-vnes où elle ſe void tenant d’vne main vne maſſuë comme celle d’Hercule, & de l’autre vn Bonnet, auecque ces mots, Libertas Avgvsti ex SC. Ce qui ſignifie vne Liberté acquiſe par la valeur, comme il ſe remarque dans la Medaille d’Antonin Heliogabale, où eſt adjouſté vn joug rompu.