50%.png

Les Prophéties de M. Nostradamus/Centurie II

La bibliothèque libre.
Sauter à la navigation Sauter à la recherche
Les Prophéties de

M. Nostradamus

Préface
Centurie I
Centurie II
Centurie III
Centurie IV
Centurie V
Centurie VI
Centurie VII
Centurie VIII
Centurie IX
Centurie X
Centurie XI
Centurie XII
Centurie II
◄  Centurie I Centurie III  ►


 
1.
Vers Aquitaine par insults Britanniques,
De par eux mesmes grands incursions :
Pluies, gelées feront terroirs iniques,
Port Selyn fortes fera invasions.

2.
Le teste bleu fera la teste blanche,
Autant de mal que France a faict leur bien,
Mort à l'anthenne, grand pendu sus la branche,
Quand prins des siens le Roy dira combien.

3.
Pour la chaleur solaire sus la mer,
De Negrepont les poissons demy cuits,
Les habitans les viendront entamer,
Quand Rhod & Gennes leur faudra le biscuit.

4.
Depuis Monach jusqu'aupres de Sicile,
Toute la plage demourra desolée,
Il n'y aura fauxbourg, cité ne ville,
Que par Barbares pillée soit & vollée.

5.
Qu'en dans poisson, fer & lettres enfermée,
Hors sortira qui puys fera la guerre,
Aura par mer sa classe bien ramée,
Apparoissant pres de Latine terre.

6.
Aupres des portes & dedans deux cités
Seront deux fleaux, & oncques n'apperceu un tel,
Faim, dedans peste, de fer hors gens boutés,
Crier secours au grand Dieu immortel.

7.
Entre plusieurs aux isles deportés,
L'un estre nay a deux dents en la gorge :
Mourront de faim les arbres esbrotés,
Pour eux neuf Roy, nouvel edict leur forge.

8.
Temples sacrés prime façon Romaine,
Rejecteront les goffes fondements,
Prenant leurs loys premieres & humaines,
Chassant non tout des saincts les cultements.

9.
Neuf ans le regne le maigre en paix tiendra,
Puis il cherra en soif si sanguinaire :
Pour luy peuple sans foy & loy mourra
Tué un beaucoup plus debonnaire.

10.
Avant long temps le tout sera rangé,
Nous esperons un siecle bien senestre :
L'estat des masques & des seuls bien changé
Peu trouveront qu'a son rang vueille estre.

11.
Le prochain fils de l'aisnier parviendra
Tant eslevé jusqu'au regne des fors
Son aspre gloire un chacun la craindra
Mais ses enfans du regne gettez hors.

12.
Yeux, clos, ouverts d'antique fantasie,
L'habit des seuls seront mis à neant
Le grand monarque chastiera leur frenesie,
Ravir des temples le tresor par devant.

13.
Le corps sans ame plus n'estre en sacrifice,
Jour de la mort mis en nativité.
L'esprit divin fera l'ame felice,
Voyant le verbe en son eternité.

14.
A Tours, Iean, gardé seront yeux penetrans,
Descouvriront de loing la grand sereyne
Elle & sa suitte au port seront entrans,
Combat, poulsés, puissance souveraine.

15.
Un peu devant monarque trucidé ?
Castor Pollux en nef, astre crinite,
L'erain public par terre et mer vuidé,
Pise, Ast, Ferrare, Turin terre interdicte.

16.
Naples, Palerme, Secille, Syracuses,
Nouveaux tyrans, fulgures feux celestes :
Force de Londres, Gand, Brucelles & Suses,
Grand hecatombe, triumphe faire festes.

17.
Le champ du temple de la vierge vestale,
Non esloigné d'Ethne & monts Pyrenées :
Le grand conduict est caché dans la male,
North getés fleuves & vignes mastinées.

18.
Nouvelle & pluye subite, impetueuse,
Empeschera subit deux excercites :
Pierre, ciel, feux faire la mer pierreuse,
La mort de sept terre et marin subites.

19.
Nouveaux venus lieu basty sans defence,
Occuper la place par lors inhabitable,
Prez, maisons, champs, villes, prendre à plaisance
Faim, Peste, guerre, arpen long labourable.

20.
Freres & sœurs en divers lieux captifs,
Se trouveront passer pres du monaique
Les contempler ses rameaux ententifs,
Desplaisant voir menton front, nez, les marques.

21.
L'ambassadeur envoyé par biremes,
A my chemin d'incogneuz repoulsés :
De sel renfort viendront quatre triremes,
Cordes & chaines en Negre pont troussés.

22.
Le camp Ascap d'Europe partira,
S'adjoignant proche de l'Isle submergée :
D'Arton classe phalange pliera,
Nombril du monde plus grand voix subrogée.

23.
Palais, oyseaux, par oyseau dechassé,
Bien tost apres le prince prevenu,
Combien que hors fleuve ennemis repoulsé,
Dehors saisi trait d'oyseau soustenu.

24.
Bestes farouches de faim fleuves tranner :
Plus part du champ encontre Hister sera,
En caige de fer le grand fera treisner,
Quand rien enfant de Germain observera.

25.
La garde estrange trahira forteresse
Espoir & umbre de plus hault mariage :
Garde deceue, fort prinse dans la presse
Loire, Son, Rosne, Gar, à mort oultrage.

26.
Pour la faveur que la cité fera,
Au grand qui tost perdra champ de bataille
Puis le rang Pau Thesin versera,
De sang, feux mors noyés de coup de taille.

27.
Le divin verbe sera du ciel frappé,
Qui ne pourra proceder plus avant.
Du reserant le secret estoupé,
Qu'on marchera par dessus & devant.

28.
Le penultiesme du surnom du Prophete,
Prendra Diane pour son jour & repos :
Loing vaguera par frenetique teste,
& delivrant un grand peuple d'impos.

29.
L'Oriental sortira de son siege,
Passer les monts Apennins voir la Gaule :
Transpercera le ciel, les eaux & neige,
& un chacun frappera de sa gaule.

30.
Un qui les dieux d'Annibal infernaux,
Fera renaistre, effrayeur des humains :
Oncq'plus d'horreur ne plus dire journaulx,
Qu'avint viendra par Babel aux Romains.

31.
En Campanie Cassilin sera tant
Qu'on ne verra que d'eaux des champs couvers
Devant apres la pluye de long temps
Hors mis les arbres rien l'on verra de vert.

32.
Laict, sang grenouilles escoudre en Dalmatie,
Conflict donné peste pres de Balennes,
Cry sera grand par toute Esclavonie,
Lors naistra monstre pres & dedans Ravenne.

33.
Par le torrent qui descent de Verone,
Par lors qu'au Po guidera son entrée,
Un grand naufrage, & non moins en Garonne
Quand ceux de Gennes marcheront leur contrée.

34.
L'ire insensée du combat furieux
Fera à table par freres le fer luyre,
Les despartir mort blessé curieux,
Le fier duelle viendra en France nuire.

35.
Dans deux logis de nuict le feu prendra
Plusieurs dedans estoufés et rostis :
Pres de deux fleuves pour seul il adviendra,
Sol, l'Arq, & Caper tous seront amortis.

36.
Du grand Prophete les lettres seront prinses.
Entre les mains du tyran deviendront,
Frauder son Roy seront ses entreprinses,
Mais ses rapines bien tost le troubleront.

37.
De ce grand nombre que l'on envoyera
Pour secourir dans le fort assiegés,
Peste & famine tous les devorera,
Hors mis septante qui seront profligés.

38.
Des condamnés sera fait un grand nombre,
Quand les monarques seront conciliés :
Mais l'un d'eux viendra si malencombre
Que guerre ensemble ne seront raliés.

39.
Un an devant le conflict Italique,
Germains, Gaulois, Hespagnols pour le fort :
Cherra l'escolle maison de republique,
Ou, hors mis peu, seront suffoqués mors.

40.
Un peu apres non point longue intervalle.
Par mer & terre sera faict grand tumulte,
Beaucoup plus grande sera pugne navalle,
Feus, animaux, qui feront plus d'insulte.

41.
La grand estoile par sept jours bruslera,
Nuée fera deux soleils apparoir :
Le gros mastin fera toute nuict hurlera,
Quand grand pontife changera de terroir.

42.
Coq, chiens, & chats de sang seront repeus,
Et de la playe du tyrant trouvé mort,
Au lict d'un autre jambes & bras rompus,
Qui n'avait peur de mourir de cruelle mort.

43.
Durant l'estoyle chevelue apparente,
Les trois grans princes seront fait ennemis,
Frappés du ciel paix terre tremulente,
Po, Timbre undans, serpent sur le bort mis.

44.
L'Aigle pousée entour de pavillions,
Par autres oyseaux d'entour sera chassée,
Quand bruit des cymbres tube & sonnaillons
Rendont le sens de la dame insensée.

45.
Trop le ciel pleure l'Androgin procrée,
Pres du ciel sang humain respandu,
Par mort trop tard grand peuple recrée,
Tard & tost vient le secours attendu.

46.
Apres grand trouble humain, plus grand s'appreste
Le grand moteur des siecles renouvele.
Pluye sang, laict, famine, fer & peste,
Au ciel veu, feu courant long estincele.

47.
L'ennemy grand vieil dueil meurt de poison :
Les souverains par infiniz subiuguez.
Pierres plouvoir, cachez soubz la toison,
Par mort articles en vain sont allegués.

48.
La grand copie qui passera les monts.
Saturne en l'Arq tournant du poisson Mars
Venins cachés soubs testes de saulmons :
Leur chef pendu à fil de polemars.

49.
Les conseilleurs du premier monopole.
Les conquerants seduits par la Melite :
Rodes, Bisance pour leurs exposant pole :
Terre faudra les poursuivans de suite.

50.
Quand ceux d'Ainault, de Gand & de Brucelles,
Verront à Langres le siege devant mis
Derrier leurs flancs seront guerres crueles
La plaie antique fera pis qu'ennemis.

51.
Le sang du juste à Londres fera faute
Bruslés par fouldres de vint trois les six.
La dame antique cherra de place haute :
De mesme secte plusieurs seront occis.

52.
Dans plusieurs nuits la terre tremblera :
Sur le prinstemps deux effors suite :
Corynthe, Ephese aux deux mers nagera :
Guerre s’esmeut par deux vaillans de luit.

53.
La grande peste de cité maritime
Ne cessera que mort ne soit vengée
Du juste sang, par pris damne sans crime
De la grand dame par feincte n'outragée.

54.
Par gent estrange, & de Romains loingtaine
Leur grand cité après eaue fort troublée,
Fille sans main, trop différent domaine,
Prins chef, sarreure n’avoir esté riblée.

55.
Dans le conflit le grand qui peut valloyt,
A son dernier fera cas merveilleux :
Pendant qu’Hadrie verra ce qu'il falloyt,
Dans le banquet pongnale l'orguilleux.

56.
Que peste & glaive n'a peu seu definer
Mort dans le puys, sommet du ciel frappé.
L'abbé mourra quand verra ruiner
Ceulx du naufraige l’escueil voulant grapper.

57.
Auant conflit le grand mur tumbera :
Le grand à mort, mort trop subite & plainte :
Nay imparfaict la plus part nagera :
Auprès du fleuve de sang la terre tainte.

58.
Sans pied ne main par dend ayguë & forte
Par globe au fort deporc & laisné nay :
Près du portail desloyal se transporte
Silene luit, petit grand emmené.

59.
Classe Gauloyse par apuy de grand garde
Du grand Neptune, & ses tridents souldars
Rousgée Provence pour soustenir grand bande :
Plus Mars Narbon, par javelotz & dards.

60.
La foy Punicque en Orient rompue
Grang Jud, & Rosne Loyre, & Tag changeront,
Quand du mulet la faim sera repue,
Classe espargie, sang & corps nageront.

61.
Euge, Tamins, Gironde & la Rochele :
O sang Troien ! Mars au port de la flesche
Derrier le fleuue au fort mise l'eschele,
Pointes feu gran meurtre sus la bresche.

62.
Mabus puis tost alors mourra, viendra
De gens & bestes une horrible defaite :
Puis tout à coup la vengence on verra
Cent, main, soif, faim, quand courra la comete.

63.
Gaulois, Ausone bien peu subjuguera,
Po, Marne, & Seine fera Perme l’urie
Qui le grand mur contre eux dressera
Du moindre au mur le grand perdra la vie.

64.
Seicher de faim, de soif gent Genevoise
Espoir prochain viendra au defaillir,
Sur point tremblant sera loy Gebenoise.
Classe au grand port ne se peult acuillir.

65.
Le parc enclin grande calamité
Par l'Hesperie & Insubre fera :
Le feu en nef, peste & captivité :
Mercure en l'Arq Saturne fenera.

66.
Par grans dangiers le captif echapé:
Peu de temps grand la fortune changée.
Dans le palais le peuple est atrapé
Par bon augure la cité est assiegée.

67.
Le blonde au nez forchu viendra commetre
Par le duelle & chassera dehors :
Les exilés dedans fera remetre
Aux lieux marins commetant les plus forts.

68.
De l'Aquilon les effors seront grands :
Sus l’Ocean sera la porte ouverte,
Le regne en l'isle sera reintegrand :
Tremblera Londres par voile descouverte.

69.
Le roy Gauloys par la Celtique dextre
Voiant discorde de la grand Monarchie,
Sus les trois pars fera fleurir son sceptre,
Contre la cappe de la grand Hierarchie.

70.
Le dard du ciel fera son extendue
Mors en parlant grande execution.
La pierre en l’arbre, la fiere gent rendue,
Brut humain monstre purge expiation.

71.
Les exilés en Sicile viendront
Pour delivrer de faim la gent estrange :
Au point du jour les Celtes luy faudront :
La vie demeure a raison: roy se range.

72.
Armée Celtique en Italie vexée
De toutes pars conflit & grande perte :
Romains fuis, ô Gaule repoulsée.
Pres du Thesin, Rubicon pugne incerte.

73.
Au lac Fucin de Benac le rivage
Prins du Leman au port de l’Orguion :
Nay de troys bras predict belliq image,
Par troys couronnes au grand Endymion.

74.
De Sens, d'Autun viendront jusques au Rosne
Pour passer outre vers les monts Pyrenées :
La gent sortir de la Marque d’Anconne :
Par terre & mer le suivra à grans trainées.

75.
La voix ouye de l'insolit oyseau,
Sur le canon du respiral estaige,
Si haut viendra du froment le boisseau,
Que l'homme d'homme sera Anthropophage.

76.
Foudre en Bourgoigne fera cas portenteux,
Que par engin ne pourroit faire
De leur senat sacriste fait boiteux
Fera savoir aux ennemis l'affaire.

77.
Par arcs, feuz, poix & par feuz repoussés :
Cris, hurlements sur la minuit ouys.
Dedans sont mis par les ramparts cassés
Par cunicules les traditeurs fuis.

78.
Le grand Neptune du profond de la mer
De gent Punique & sang Gauloys meslé,
Les Isles à sang, pour le tardif ramer :
Plus luy nuira que l'occult mal celé.

79.
La barbe crespe & noire par engin
Subjuguera la gent cruele & fiere.
Le grand chyren ostera du longin
Tous les captifs par Seline baniere.

80.
Apres conflit du lesé l'eloquence
Par peu de temps se tramme faint repos :
Point l'on n'admet les grands à delivrance :
Les ennemis sont remis à propos.

81.
Par feu du ciel la cité presque aduste :
L’urne menasse encor Deucalion :
Vexée Sardaigne par la Punique fuste
Apres que Libra lairra son Phaëton.

82.
Par faim la proye fera loup prisonnier
L'assaillant lors en extreme detresse.
Le nay aiant au devant le dernier,
Le grand n’eschappe au milieu de la presse.

83.
Le gros trafficq du grand Lyon change
La plus part tourne en pristine ruine,
Proye aux souldars par pille vendange
Par Jura mont & Sueve bruine.

84.
Entre Campaigne, Sienne, Flora, Tuscie
Six moys neufz iours ne plouura vne goute.
L'estrange langue en terre Dalmatie
Courira sus, vastant la terre toute.

85.
Le vieux plain barbe sous l'estatut severe,
A Lyon fait dessus l'Aigle Celtique :
Le petit grand trop outre persevere :
Bruit d’arme au ciel : mer rouge Lygustique.

86.
Naufraige a classe pres d'onde Hadriatique:
La terre esmeuë sus l'air en terre mis :
Egypte tremble augment Mahommetique
L'Herault soy rendre à crier est commis.

87.
Apres viendra des extremes contrées
Prince Germain sus le throsne doré :
La servitude & eaux rencontrées
La dame serve, son temps plus n'adoré.

88.
Le circuit du grand faict ruineux
Le nom septiesme du cinquiesme sera :
D'un tiers plus grand l’estrange belliqueux.
Monton, Lutece, Aix ne garantira.

89.
Du jou seront demis les deux grands maistres
Leur grand pouvoir se verra augmenté :
La terre neufve sera en ses haults estres :
Au sanguinaire le nombre racompté.

90.
Par vie & mort changé regne d’Ongrie :
La loy sera plus aspre que service,
Leur grand cité d'urlements plaincts & crie :
Castor & Pollux ennemis dans la lyce.

91.
Soleil levant un grand feu l'on verra
Bruit & clarté vers Aquilon tendant :
Dedans le rond mort & cris l'ont orra
Par glaive, feu, faim, mort les attendants.

92.
Feu couleur d'or du ciel en terre veu :
Frappé du hault, nay, fait cas merveilleuz :
Grand meurtre humain : prins du grand le nepveu,
Morts d’expectacles eschappé l’orguilleux.

93.
Bien pres du Tymbre presse la Libytine :
Ung peu devant grand inundation :
Le chef du nef prins, mis a la sentine :
Chasteau, palais en conflagration.

94.
GRAN Po, grand mal pour Gauloys recevra,
Vaine terreur au maritin Lyon :
Peuple infini par la mer passera,
Sans eschapper un quart d'un milion.

95.
Les lieux peuples seront inhabitables:
Pour champs auoir grande diuision:
Regnes liurés a prudents incapables:
Lors les grands freres mort & dissension.

96.
Flambeau ardent au ciel soir sera veu
Pres de la fin & principe du Rosne :
Famine, glaive : tard le secours pourveu,
La Perse tourne envahir Macedoine.

97.
Romain Pontife garde de t'approcher
De la cité qui deux fleuves arrouse,
Ton sang viendras au pres de la cracher,
Toy & les tiens quand fleurira la rose.

98.
Celuy du sang resperse le visaige
De la victime proche sacrifiée :
Tonant en Leo augure par presaige :
Mis estre à mort lors pour la fiancée.

99.
Terroir Romain qu'interpretoit augure,
Par gent Gauloyse sera par trop vexée:
Mais nation Celtique craindra l'heure,
Boreas, classe trop loing l'avoir poussée.

100.
Dedans les isles si horrible tumulte,
Rien on n’orra qu'une bellique brigue,
Tant grand sera des predateurs l'insulte,
Qu'on se viendra ranger à la grand ligue.