◄ Laisse DIX | Laisse DX | Laisse DXI ► |
Mout fu le stormant sage de le marine paine ;
Il dit a ses sergant : « Est il l’aires serainne
« Et les orage droit que a Balstres nos amaine ?
« Coulomes tantost voile ver l’aute meriaine
« Avant que nos sorvaigne li vant de tramontaine. »
Lors colirent les voille, uzant a aute lainne ;
Les governaus tornent vers la tere luntaine.
Chant fu cescune voille del bons orage plaine,
Plus tot non coruit mais un livrer par la plaine
Come la nef randone par l’aute mer altaine.
Chant ensi voit Rolant, si li doucist la vaine,
Membre lui d’Oliver et del roi Karlemaine ;
Un sangloz de plurer li vint, que nel refraine.
Chant ill en ot loisir, si dist : « Ai ! sante Alaine,
« Que trovastes la crois qu’est noutre zavetaine,
« Atrovez moi cunsoil o Fortune me maine ;
« Et non soit oblïés l’impereor Roumaine. »
Le stormant vint a lui cum une ciere plaine :
« Cun este vos ? » fait il ; « quel penser vos demaine ?
« N’aiés paor dou mer, car plus est la nef saine
« Au besoing qu’ele fait que au chaut la funtaine.
« Vos deüsés plus estre joians de nulle aiguaine,
« Chant plus avés cunquis en un jor de semaine
« Que non fist Alixandre sor la giant Indiaine.
« Volés oïr çanter li vers de Galiaine,
« Com elle dounoia Karles au primiraine ?
« Mes sergant zantent plus cler e doz qe seraine.
« Chant xeromes a Baustres, qe tant est d’avor plaine,
« Je vos aconterai mun sir le roi Albainne :
« Cert sui qu’il vos fera, avant la quarentaine,
« Son matre mareschaus, de gere zavetaine. »
E cun cist cunforter au duc xon duel refraine.