Le Jeu de saint Nicolas/Li jus de saint Nicholai
Oiiés, oiiés, seigneur et dames,
Que Diex vous soit garans as ames !
De vostre preu ne vous anuit ;
Nous volommes parler anuit
De saint Nicolai, le confés,
Qui tant biaus miracles a fais.
Che nous content li voir disant
Qu’en sa vie trouvons lisant
Que jadis fu uns rois paiiens
Qui marchissoit as crestïens.
Chascun jour ert entr’eus la guerre ;
Un jour fist li paiens requerre
Les crestïens en itel point
Que il ne se gaitoient point ;
Decheü furent et souspris ;
Mout en i ot et mors et pris.
Legierement les desconfirent,
Tant qu’en une manoque virent
Ourer un preudomme d’eage
A genous devant une ymage
De saint Nicolai le baron.
La vinrent li cuivert felon ;
Mout li firent honte et anui ;
Puis prisent et l’image et lui,
Mout ferm l’adestrerent et tinrent
Tant que il devant le roy vinrent,
Qui mout fu liés de le victoire ;
E chil li conterent l’estoire
Del crestïen, che fu la somme.
« Vilains, dist li rois au preudome,
En chel fust as i tu creanche ?
— Sire, ains est fais en le sanlanche
Saint Nicolai, que je mout aim.
Pour che l’aour je et reclaim
Que nus hom qui l’apiaut du cuer
N’iert ja esgarés a nul fuer ;
Et s’est si bonne garde eslite
Que il monteploie et pourfite
Canque on li commande a garder.
— Vilains, je te ferai larder
S’il ne monteploie et pourgarde
Mon tresor ; je li met en garde,
Pour ti sousprendre a occoison. »
Atant le fait metre en prison
Et un carquan ou col fremer ;
Puis fist ses escrins deffremer
Et deseure couchier l’image,
Puis dist, se nus l’en fait damage
Et il ne l’en set rendre conte,
Mis iert li crestïens a honte.
Ensi commanda son avoir,
Tant c’as larrons vint assavoir ;
Une nuit il troi s’assanlerent,
Au tresor vinrent, si l’emblerent ;
Et quant il l’en orent porté,
Si leur donna Diex volenté
De dormir : tes sommes lor vint
Qu’iloeuc endormir les couvint,
Ne sai ou, en un abitacle.
Mais pour abregier le miracle,
M’en passe outre, selonc l’escrit.
Et quant che sot li rois et vit
Que son tresor a desmané,
Lors se tint il a engané :
Le vilain a mener commande.
Quant il le vit, se li demande :
« Vilains, pour coi m’as tu dechut ? »
A paines respondre li lut
Le preudome, si le menoient
Chil qui d’ambes pars le tenoient.
L’un le boute, l’autre le sache.
Li roys commande c’on le fache
Morir de mort laide et despite.
« A, roys, pour Dieu ! Car me respite
Anuit mais, fait li crestïens,
Savoir se ja de ches lïens
Me geteroit sains Nicolais. »
A grant paine l’en fist relais.
Mais issi le conte le lettre
Qu’en se chartre le fist remetre.
Et quant remis fu en prison.
Toute nuit fu a orison,
Onques de plourer ne cessa.
Sains Nicolais s’achemina,
Qui n’ouvlie pas son serjant,
As larrons en vint ataignant.
Ses esvilla, car il dormirent ;
Et maintenant, quant il le virent,
Si furent loeus entalenté
D’esploitier a se volenté ;
Et il, sans point de deporter,
Lor fist arriere reporter
Le tresor, sans point de demeure,
Et mettre l’ymage deseure
Ensi comme il l’orent trouvé.
Quant li roys l’ot ensi prouvé
Le haut miracle du bon saint,
Lors commanda que on li maint
Le preudomme sans lui grever.
Baptisier se fist et lever
Et lui et ses autres paiens.
Preudom fu et bons crestïens ;
Ainc puis n’ot de mal faire envie.
Signeur, che trouvons en le vie
Del saint dont anuit est la veille.
Pour che n’aiés pas grant merveille,
Se vous veés aucun affaire ;
Car canques vous nous verrés faire
Sera essamples sans douter
Del miracle representer
Ensi con je devisé l’ai.
Del miracle saint Nicolai
Est chis jeus fais et estorés ;
Or nous faites pais, si l’orrés.
le roi, le sénéchalauberons li courlius
Roys, chil Mahom qui te fist né
Saut et gart toi et ten barné
Et te doinst forche de resqueurre
De chiaus qui te sont courut seure
Et te terre escillent et proient
Et nos dieus n’onneurent ne proient,
Ains sont crestien de put lin !
Ostés, pour mon Dieu Apolin !
Sont dont crestïen en ma terre ?
Ont il esmeüe la guerre ?
Sont il si hardi ne si os ?
Rois, tes empires ne teuls os
Ne fu puis que Noeus fist l’arche,
Con est entree en ceste marche.
Par tout keurent ja li fourrier,
Putain et ribaut et houlier
Vont le païs ardant a pourre.
Roys, s’or ne penses de rescourre,
Mis est a perte et a lagan.
A ! fiex a putain, Tervagan,
Avés vous dont souffert tel oeuvre ?
Com je plaing l’or dont je vous cuevre
Che lait visage et che lait cors !
Certes, s’or ne m’aprent mes sors
Les crestïens tous a confondre,
Je vous ferai ardoir et fondre
Et departir entre me gent.
Car vous avés passé argent :
S’estes du plus fin or d’Arrabe.
Senescaus, a poi je n’esrabe,
Et muir de mautalent et d’ire.
A, roys ! Nel deüssiés pas dire
Tel outrage ne tel desroi.
N’affiert a conte ni a roi
D’ensi ses diex mesaesmer ;
Vous en faites mout a blamer.
Mais puis que conseillier vous doi,
Alons a Tervagan andoi
Prier qu’il ait pardon de nous,
A nus keutes, a nus genous,
Si que par sa sainte vertu
Soient crestïen abatu,
Et se l’onnour devons avoir,
Que il nous en fache savoir
Tel vois et tel senefianche
Ou nous puissons avoir fianche.
En che conseil n’a point d’engan,
Et si prometés Tervagan
Dis mars d’or a croistre ses joes.
Alons i, puis que tu le loes.
Tervagan, par melancolie
Vous ai hui dit mainte folie ;
Mais g’iere plus ivres que soupe.
Merchi vous proi, s’en renç me coupe
A nus genous et a nus keutes,
Que miex me venist avoir teutes.
Sire, li tiens secours me viegne
Et de no loy hui te souviegne
Que crestïen tolir nous cuident.
Ja sont espars par me terre ample.
Sire, par sort et par essample
Me demoustre comment s’en wident.
Si le moustre a ton ami,
Par sort ou par art d’anemy,
S’envers aus me porrai resceurre.
En tel maniere le me di :
Se je doi gaagnier, si ri ;
Et se je doi perdre, si pleure.
Senescal, que vous est avis ?
Tervagan a plouré et ris.
Chi a mout grant senefianche.
Certes, sire, vous dites voir ;
El rire poés vous avoir
Grant seürté et grant fianche.
Senescal, foi que dois Mahom !
Si que tu iés mes liges hom,
Che sort me demoustre et espel.
Sire, foi que je doi vo cors !
S’espielus vous estoit li sors,
Je croi ja ne vous sera bel.
Senescal, n’aiés pas peür :
De tous mes diex vous asseür,
Jus soit et fieste necaudent.
Sire, bien vous croi seur les diex ;
Mais assés vous querroie miex
Se vous l’ongle hurtïés au dent.
Senescal, n’aiés pas doutanche ;
Vés chi le plus haute fianche :
Se vous aviés men pere mort,
N’averiés vous mais de moi garde.
Or n’ai pas le langue couarde,
Ja seront despondu li sort :
Che qu’il rist primes, c’est vos biens ;
Vous vainterés les crestïens
A l’eure que contre aus irés ;
Et s’ot droit s’il ploura aprés,
Car c’est grans dolours et grans pes
Qu’en fin vous le relenquirés :
Ensi avenra entresait.
Senescal, cinc cens dehais ait
Quil dist ne qui l’a en pensé !
Mais, foi que doi tous mes amis,
Se li dois ne fust au dent mis,
Ja Mahom ne t’eüst tensé
Que ne te feïsse deffaire.
Cui quaut ? Or parlons d’autre affaire :
Alés, se faites crier l’ost,
Que tout viegnent en me besoigne
D’Orient dusqu’en Kateloigne.
Or cha ! Connart, si crie tost.
Oiiés, oiiés, oiés, signeur,
Oies vo preu et vo honneur.
Je faç le ban le roy d’Aufrike :
Que tout i viegnent, povre et rique.
Garni de leur armes, par ban.
De le terre Prestre Jehan
Ne remaigne jusques al Coine :
D’Alixandre, de Babiloine,
Li Kenelieu, li Achopart,
Tout vegnent garni ceste part,
Et toute l’autre gent grifaigne.
Seürs soit qui c’onques remaigne
Que li roys le fera tuer.
N’i a plus, or poés huer.
Auberonli rois a auberon
Di va ! Iés tu chaiens, Auberons, mes courlieus ?
Sire, veés me chi, ne vous sui mie eskiex.
Auberon, au bien courre soies entalentiex.
Va moi par tout semonre Gaians et Queneliex.
Moustre par tout mes lettres et mon seel apert,
Comment par crestïens ma loys dechiet et pert.
Chil qui demouerront soient seür et chert
Qu’il et leur oir seront a tous jours mais cuivert.
Va t’en, je te cuidoie ja dehors le banlieue.
Sire, n’en doutés ja, nus cameus une lieue
N’est tant isniaus de courre que je nel raconsieue,
Derrier moi ne le meche devant demie lieue.
Auberonli taverniers
Chaiens fait bon disner, chaiens !
Chi a caut pain et caus herens,
Et vin d’Aucheurre a plain tonnel.
A ! saint Beneoit, vostre anel
Me laissiés encontrer souvent !
Que vent on chaiens ?
Amis, un vin qui point ne file.
A conbien ?
Au ban de le vile.
Je n’en serai a nul fourfait
Ne du vendre ne du mestrait.
Seés vous cha en ceste achinte.
Ostes, mais sachiés une pinte,
Si buverai tout en estant ;
N’ai cure de demourer tant.
De moi couvient prendre conroi.
A cui iés tu ?
Si port son seel et son brief.
Tien, chis te montera ou chief ;
Boi bien, li mieudres est au fons.
Chis hanas n’est mie parfons,
Il fust bons a vin assaier.
Dites, combien doi je paier ?
Je faç que faus, qui tant demeure.
Paie denier et a l’autre eure
Aras le pinte pour maaille ;
C’est a douze deniers sans faille ;
Paie un denier ou boi encore.
Mais le maille prenderés ore
Et au revenir le denier.
Veus tu faire ja le panier ?
Au mains me dois tu trois partis.
Ains que de chi soies partis,
Sarai bien a coi m’en tenrai.
Ostes, mais quant je revenrai
S’arés un denier pour le pinte.
Par foi ! c’ert a candoille estinte ;
Pour noient te pués travillier.
Ne me puis a vous awillier,
S’une maaille en deus ne caup.
Cliquetclikés
Qui veut un parti a che caup,
Pour esbanïer, petit gieu ?
Avés oï, sire courlieu ?
Alés euwillier vostre affaire.
Soit pour un parti, a pais faire !
Pour un ? Mais pour canques tu dois.
Or fai dont dire l’oste anchois.
Che ne seroit mie fourfais.
Dites, ostes, en’ est il pais ?
Oïl, anchois que nus s’en tourt.
Giete as plus poins, sans papetourt.
Il s’en vont, n’en ai nul assis.
Par foi ! tu n’as ne cinc ne sis ;
Ainsi i a ternes et un as.
Che ne sont que set poins, élas !
Con par sui mesqueans a des !
Toutes eures giet jou aprés,
Biaus dous amis, coi que tu aies,
Tu n’en goutas et si le paies :
J’ai quaernes, le plus mal gieu.
Honnis soient tout li courlieu ;
Car tous jours sont il a le fuite.
Biaus ostes, chis vassaus m’acuite ;
Il me dist lait, mais nequedent.
Va, va, mar vit li piés le dent.
les amirauxauberons
Mahom saut l’amiral del Coine,
De par le roy, qui sans essoigne
Li mande qu’en s’aïe viegne !
Auberon, che me di au roy :
Je li menrai riche conroi,
N’iert essoigne qui me retiegne.
Mahom te saut et beneïe,
Riches amiraus d’Orkenie,
Par le roy, qui secours te mande !
Auberons, Mahom sauve lui !
Va t’ent. Je m’en irai ancui,
Des puis que il le me commande.
Chis Mahommés qui tout gouverne
Te saut, riches roys d’Olifferne
De par le roy, qui te semont !
Auberon, che pués le roy dire
Que g’i menrai tout men empire ;
Nel lairoie pour tout le mont.
Amiraus d’outre le Sec Arbre,
Li roys d’Aïr, Tranle et Arabe,
Pour le guerre des crestïens
Te mande le secours prochain.
Auberon, le matin bien main
Vous menrai cent mile païens.
le roiauberons
Roys, Mahom toi et te maisnie
Saut et gart !
Auberons ! Con as esploitié ?
Certes, sire, tant ai coitié
Par Arrabe et par paienime,
C’ainc si grant pule, de le dime,
N’eut nus roys de païens ensanle,
Comme il vient a toi, che me sanle,
Conte et roy, et prinche et baron.
Va t’en reposer, Auberon !
les amirauxli amiraus del coine
Roys, d’Apolin et de Mahom
Te salu con tes liges hom,
Car venus sui a ten commant :
Jel doi faire par estouvoir.
Biaus amis, vous faites savoir ;
Tous jours venés quant je vous mant.
Roys, d’assés outre Pré Noiron,
La terre ou croissent li ourton,
Sui venus pour vostre menache.
A grant tort ja mais me harrés ;
Venus sui a cauchiers ferrés,
Trente journees parmi glache.
Di, qui sont chil en chele rengue ?
Sire, d’outre Grise Wallengue,
La ou li chien esquitent l’or.
Moi devés vous forment amer
Car je vous faç venir par mer
Cent navees de mon tresor.
Segneur, de vo paine ai grant pec
Et dont iés tu ?
Unes terres ardans et caudes.
Ne sui mie vers vous escars,
Car je vous amain trente cars
Plains de rubis et d’esmeraudes.
Et tu qui m’esgardes alec.
Dont iés tu ?
Ne sai comment rien vous donroie,
Car en no païs n’a monnoie
Autre que pierres de moelin.
Ostés, pour men dieu Mahommet !
Con fait avoir chis me promet !
Bien sai que ja mais povres n’iere.
Sire, ne vous mentirai rien ;
En no païs emporte bien
Uns hom cent saus en s’aumoniere.
le sénéchalli senescaus
Roys, puis que vo baron vous sont venu requerre,
Faites leur maintenant les crestïens requerre.
Senescal, par Mahom ! ne leur faurra mais guerre
S’ierent ou mort ou pris ou cachié de le terre.
Alés i, senescal ; dites leur de par moi
Que maintenant se mechent sagement en conroi.
Segneur, a tous ensanle vous di de par le roy
Que vous alés fourfaire seur crestïene loy.
Pour crestïens confondre fustes vous chi mandé.
Che qu’il nous ont fourfait couvient estre amendé.
Alés i maintenant, li roys l’a commandé.
Alons, a Mahommet soiions nous commandé !
un angeli crestien parolent
Sains sepulcres, aïe ! Segneur, or du bien faire !
Sarrasin et païen vienent pour nous fourfaire,
Vés les armes reluire : tous li cuers m’en esclaire.
Or le faisons si bien que no proueche i paire ;
Contre chascun des nos sont bien cent par devise.
Segneur, n’en doutés ja, vés chi nostre juïse :
Bien sai tout i morrons el Damedieu servise.
Mais mout bien m’i vendrai, se m’espée ne brise.
Ja n’en garira un ne coiffe ne haubers.
Segnieur, el Dieu serviche soit hui chascuns offers !
Paradys sera nostres et eus sera ynfers.
Gardés a l’assanler qu’il encontrent no fers !
Segneur, se je sui jones, ne m’aiés en despit !
On a veü souvent grant cuer en cors petit.
Je ferrai cel forcheur, je l’ai piecha eslit ;
Sachiés je l’ochirai, s’il anchois ne m’ochit.
Segneur, soiés tout asseür,
N’aiés doutanche ne peür.
Messagiers sui Nostre Segneur,
Qui vous metra fors de doleur.
Aiés vos cuers fers et creans
En Dieu : ja pour ches mescreans
Qui chi vous vienent a bandon
N’aiés les cuers se seürs non.
Metés hardiement vos cors
Pour Dieu, car chou est chi li mors
Dont tout li pules morir doit
Qui Dieu aime de cuer et croit.
Qui estes vous, biaus sire, qui si nous confortés
Et si haute parole de Dieu nous aportés ?
Sachiés, se chou est voirs que chi nous recordés,
Asseür rechevrons nos anemis mortés.
Angles sui a Dieu, biaus amis ;
Pour vo confort m’a chi tramis.
Soiés seür, car ens es chiex
Vous a Diex fait sieges esliex ;
Aies, bien avés commenchié ;
Pour Dieu serés tout detrenchié,
Mais le haute couronne arés.
Je m’en vois ; a Dieu demourés.
le prud’hommeli amiraus del coine
Segneur, je sui tous li ainnés
Si ai mains beaus conseus donnés.
Creés moi, che sera vos preus :
Chevalier sommes esprouvé,
Se li crestïen sont trouvé,
Gardés qu’il n’en escap uns seus.
Escaper, li fil a putain !
Je ferrai si le premerain.
Mais gardés que nus n’en estorge.
Segneur, ne soiés ja doutant
Que jou n’en ochie autretant
Con Berengiers soiera d’orge.
Segneur tüeour, entre vous
Ochirrés les ore si tous
Que vous ne m’en lairés aucun ?
Veés ichi le gent haïe.
Li chevalier Mahom, aïe !
Ferés, ferés tout de commun !
Segneur baron, acourés tost !
Toutes les merveilles de l’ost
Sont tout gas fors de che caitif.
Vés chi un grant vilain kenu,
S’aoure un mahommet cornu.
Ochirrons le ou prenderons vif ?
N’en ochirrons mie, par foy !
Ains le menrons devant le roy
Pour merveille, che te promet.
Lieve sus, vilain, si t’en vien !
Segneur, or le tenés mout bien,
Et je tenrai le mahommet.
le prud’hommeli angeles
A ! chevalier qui chi gisiés,
Com par estes bon eüré !
Comme or ches eures despisiés
Le mont ou tant avés duré !
Mais pour le mal k’eü avés,
Mien ensiant, tres bien savés
Quels biens chou est de paradys,
Ou Diex met tous les siens amis.
A vous bien prendre garde doit
Tous li mons et ensi morir,
Car Dieus mout douchement rechoit
Chiaus qui o lui voelent venir.
Qui de bon cuer le servira
Ja se paine ne perdera,
Ains sera es chieus couronnés
De tel couronne comme avés.
Sains Nicolais, dignes confés,
De vostre home vous prende pés ;
Soiés me secours et garans.
Bons amis Dieu, vrais conseilliere,
Soiés pour vostre home veilliere,
Si me wardés de ches tirans.
Preudom, qui si iés efferés,
Soies en Dieu preus et senés !
Se t’en mainnent chist traïtour,
N’aies pour çou nule paour ;
En Damedieu soies bien chers
Et en saint Nicolai aprés ;
Car tu aras sen haut confort,
S’en foy te voit seür et fort.
le roi, le sénéchal,
le prud’hommeli amiraus del coine
Roys, soies plus liés c’onques mais,
Car te guerre avons mis a pais
Par no avoir et par no sens.
Mort sont li larron, li cuivert,
Si que li camp en sont couvert
A quatre lieues en tous sens.
Segneur, mout m’avés bien servi.
Mais ainc mais tel vilain ne vi
Comme je voi illeuc a destre.
De chele cocue grimuche
Et de che vilain a l’aumuche
Me devisés que che puet estre.
Roys, pour merveilles esgarder
Le t’avons fait tout vif garder.
Or oiés dont il s’entremet :
A genous le trouvai ourant,
A jointes mains et en plourant
Devant sen cornu mahommet.
Di, va ! vilains, se tu i crois.
Oïl, sire, par sainte crois !
Drois est que tous li mons l’aourt.
Or me di pour coi, vilains lais.
Sire, chou est sains Nicolais
Qui les desconsilliés secourt.
Tant sont ses miracles apertes :
Il fait ravoir toutes les pertes,
Il ravoie les desvoiés,
Il rapele les mescreans,
Il ralume les nonvoians.
Il resuscite les noiiés ;
Riens qui en se garde soit mise
N’iert ja perdue ne maumise,
Tant ne sera abandonnee,
Non, se chis palais ert plains d’or,
Et il geüst seur le tresor :
Tel grasse li a Diex donnee.
Vilains, che sarai jou par tans :
Ains que de chi soie partans,
Tes Nicolais iert esprouvés :
Mon tresor commander li voeil.
Mais se g’i perç nis plain men oeil,
Tu seras ars ou enroués.
Senescal, maine le a Durant,
Men tourmentëour, men tirant,
Mais garde qu’il soit fers tenus.
Durant, le prud’hommeli senescaus
Durant, Durant, oevre le chartre !
Tu aras ja ches piaus de martre.
A foi, mau soiés vous venus !
Sire, con vo machue est grosse !
Entrés, vilains, en cele fosse !
Aussi estoit li chartre seule.
Ja mais tant que soies mes bailles,
N’ierent huiseuses mes tenailles,
Ne que tu aies dent en geule.
le prud’hommeli angeles
Preudons, soies joians !
N’aies nule paour !
Mais soies bien crëans
Ens ou vrai Sauveour
Et en saint Nicolai,
Que jou de verté sai
Que sen secours aras ;
Le roy convertiras
Et ses barons metras
Fors de leur fole loy
Et si tenront le foy
Que tienent crestïen
.........
.... de cuer vrai
Croi en saint Nicolai.
le roi, Connartli senescaus
Sire, il est en le cartre mis.
Or senescaus, biaus dous amis,
Tous mes tresors, canques j’en ai,
Voeil que il soient descouvert,
Et huches et escrin ouvert ;
Si metés sus le nicolai.
Sire, vo commandise est faite ;
N’i a mais ne serjant ne gaite.
Or poés dormir assëur.
Voire, foi que doi Apolin !
Mais se je perç un estrelin
Avoir puet li vilains peür ;
Trop se puet en son Dieu fier.
Or faites tost mon ban crier !
Je voeil qu’il soit par tout seü.
Or cha, Connart, criés le ban,
Que li tresors est a lagan.
Mout est bien a larrons keü.
Oiiés, oiiés, segneur trestout !
Venés avant, faites me escout :
De par le roi vous fai savoir
C’a son tresor n’a son avoir
N’ara ja mais ne clef ne serre.
Tout aussi comme a plaine terre
Le puet on trouver, che me sanle :
Et qui le puet embler, si l’emble !
Car il ne le garde mais nus
Fors seus uns mahomés cornus,
Tous mors, car il ne se remue.
Or soit honnis qui bien ne hue !
Caignet, Connart,
Raouletli tavreniers
Caignet, nous vendons mout petit ;
Va, se di Raoul que il crit
Le vin ; le gent en sont saoul.
Or cha : si crierés, Raoul,
Le vin aforé de nouvel,
Qui est d’Aucheurre, a plain tonnel.
Qu’est che, musars ? Que veus tu faire ?
Veus me tu tolir mon affaire ?
Sié cois, car envers moi mesprens.
Qui iés tu, qui le me deffens ?
Di moi ton non, se Diex te gart.
Amis, on m’apele Connart.
Crieres sui par naïté
As eskievins de la chité.
Soisante ans a passés, et plus,
Que de crier me sui vescus.
Et tu, con as non, je te pri ?
J’ai non Raouls qui le vin cri ;
Si sui as homes de le vile.
Fui, ribaus, lai ester te gille.
Car tu cries trop a bas ton ;
Met jus le pot et le bâston,
Car je ne te pris un festu.
Qu’est che, Connart ? boutes me tu ?
Oïl, pour poi je ne te frap ;
Met jus le pot et le hanap,
Si me claime le mestier quite !
Oiiés, quel lecherie a dite
Qui me roeve crier notorne.
Connart, or ne fai pas le prorne,
Que tu n’aies ton peleïç !
Tous jours sont connart bateïç.
Ja n’ierent liet s’on ne les bat.
Sire, Raoulés se combat,
Il et Connars, pour le mestier.
Ho, ho ! segneur, che n’a mestier ;
Sié cois, Raoul, et tu, Connart !
Si vous metés en mon esgart,
Vous i gaengnerés andoi.
Jou l’otroi bien.
Se jou tout perdre le devoie.
Certes, ains irai droite voie :
De le vile ait chascuns sen ban.
Connart, tu crieras le ban,
S’iers au roi et as eskievins,
Et Raouls criera les vins,
S’i prendera au mains son vivre.
Pour chou se Raoulés s’enivre,
Ne voel pas c’on vers lui mesprende.
Va, Raoulet, si li amende !
Ne voeil pas qu’il i ait discorde.
Tenés, Connart, par non d’acorde !
L’uns se doit en l’autre fier.
Pais en est ; va ten vin crier !
Le vin aforé de nouvel,
A plain lot et a plain tonnel,
Sade, bevant, et plain et gros,
Rampant comme escuireus en bos,
Sans nul mors de pourri ne d’aigre.
Seur lie court et sec et maigre,
Cler con larme de pecheour ;
Croupant seur langue a lecheour ;
Autre gent n’en doivent gouster.
Raouletpincedés
Adont en doi je bien gouster,
Puis qu’il est tailliés a no moy.
Mains lechiere en bevra de moy,
Car je l’ai tous jours a coustume.
Vois con il mengüe s’escume,
Et saut et estinchele et frit ?
Tien le seur le langue un petit,
Si sentiras ja outrevin.
Hé, Diex ! c’est chi blés de Henin !
Comme il conroie bien un home !
Cliquet, le tavernierclikés
Or cha, Pinchedé, willecomme !
Aussi estoie je tous seus.
Certes, Cliquet, entre nous deus
Avons mainte fois but ensanle.
Pinchedé, du vin que te sanle ?
G’i ai ja descarquiet me ware.
Tant qu’il soit deseure le bare
Ne quier ja mais passer le voie.
Bevons un denier, toute voie.
Saque nous demi lot, Caignet !
Sire, car contés a Cliquet,
Ains qu’il commenç nouvel escot.
Cliquet, tu devoies un lot
Et puis un denier de ton gieu,
Et trois partis pour le courlieu :
Che sont cinc deniers, poi s’en faut.
Cinc denier soient, ne m’en chaut.
Aine ostes ne me trouva dur.
Caignet, or le sache tout pur
Pour Pinchedé qui venus est.
Par foi ! Chi a povre conquest,
Car nous n’i gaaignerons waires.
Caignet, honnis soit or vos traires
Et qui si faussement le sake !
Que quiert si souvent a saint Jake
Hons qui le gent escorche et poile ?
Aportés nous de le candoille,
Se tant de bien faire savés !
Or tost ! en le paume l’avés.
Tenés, or i a deus deniers.
Au conter n’iés tu point laniers,
N’au mesconter, s’on te veut croire.
Verse, Cliquet, si me fai boire !
Pour poi li levre ne me fent.
Be ! boi assés ! qui te deffent ?
Boi, de par Dieu ! Bon preu te fache !
Diex ! quel vin ! Plus est frois que glache.
Boi, Cliquet ! Chi a bon couvent.
Li ostes ne set que il vent ;
A seize fust il hors anchois.
Santissiés pour le marc dou cois
Et pour son geugon qui la seme.
Voire, et qui maint bignon li teme
Quant il trait le bai sans le marc.
Cliquet, foi que tu dois saint Marc,
Taisiés vous ent, n’en parlés mais !
Mais bevons en bien et en pais,
Nous avons encor vin el pot
De no premerain demi lot,
S’avons de le candoille ardant.
Rasoirrasoirs
Et Diex vous saut, segneur serjant !
Or ai canques j’ai demandé
Quant j’ai Cliquet et Pinchedé :
Mout les desiroie a veoir.
Or cha, Rasoir ! Venés seoir,
S’arés de no commenchement.
Certes, segneur, hardiement
Me meterai en vostre otroi :
Nous sommes compaignon tout troi.
Donnés li boire viaus, Cliquet !
Vois comme il fait le velouset ?
Boi, Rasoir ! Bien t’est avenu,
Encor n’avons nous plus venu,
Au premier caup nous as ratains.
Ha, certes ! segneur, c’est del mains :
S’il en fussent venu dis lot,
N’eskievasse jou vostre escot.
Sommes nous ore a racointier ?
Caignet, or sache un lot entier :
Se Dieu plaist, bien sera rendu.
Rasoirs a son asne vendu,
Qui si fierement rueve traire.
Par foi ! Je ne saroie el faire :
Bevons assés, bien sera saus.
Se nous deviens chaiens vint saus,
Ne sui je gaires esmaiés
Que l’ostes n’en soit bien paiés
Ains demain jour, s’il s’i embat.
Par foi ! Chis a songiet escat,
Qui si parole fierement.
Tproupt, tproupt ! Bevons hardiement !
Ne faisons si le coc emplut.
Rasoirs, nous avommes tant but
Que no drapel en demourront.
Tenés, Cliquet ! Cinc denier sont,
Trois de chest vin et devant deus.
Est il tout purs, si t’aït Diex ?
Oïl, foi que je doi saint Jake !
Purs est, enne, voire, me vaque ?
Tien, boi, saches mon que tu vens.
Tenés, Rasoir, par uns couvens
Que ne tenistes tel auwan.
Cliquet, verse vin a lagan !
S’assaierons de che nouvel,
Il en a encore ou tounel,
Et nous finerons bien chaiens.
Rasoir, as tu mengié herens ?
Tu en as bien te part beüe.
Ains a trouvé cape keüe,
Pinchedé, jel sai par mes iex.
Tproupt, tproupt, ou que soit, passe diex !
Verse con se che fust cervoise !
Rasoir, nous comprons vo ricoise,
Qui ne nous est mie commune.
Vous fustes anuit a la brune :
S’estes ore seur vos gaveles.
Non sui, voir, ains sai tes nouveles
Dont grans biens nous porra venir.
Dont pourriés vous bons devenir
S’on i pooit metre les mains.
Or bevons plus, si parlons mains,
Car recouvrees sont nos pertes :
Les granges Dieu sont aouvertes ;
Ne puet muer ne soions rique,
Car au tresor le roi d’Aufrique,
A coupe n’a hanap n’a nef
N’a mais ne serrure ne clef,
Ne serjant qui le gart nul’eure.
Ains gist uns mahommés deseure,
Ne sai ou de fust ou de pierre.
Ja par lui n’en ora espiere
Li rois, s’on li taut tout ou emble.
Ancui irons tout troi ensamble
Quant nous sarons qu’il en ert eure.
Est che voirs, que Diex te sekeure ?
Est voirs ? Oïl, par saint Jehan,
Car j’en oï crier le ban,
Qu’il n’iert ja mais hom qui le gait,
Mais qui en puist avoir, s’en ait !
Gardés s’on puet chi sus acroire.
Verse, Pinchedé, fai li boire,
Il a bien dit, une buvee ;
Tien, Rasoir, et une levee
Te doins, quant me verras juer,
Que je ne m’en quier remuer,
Toute li premiere soit tieue,
Sel pren, quel eure que je gieue,
Que ja ne tel quier eskiever.
Or m’en souvient. Qui vient juer ?
Pinchedé, hocherons as crois ?
Mais a le mine, entre nous trois,
Seur che gaaing, a bonne estraine.
Biaus ostes, preste me une onzainne,
Si devrai dis et set par tout.
Tu mesprens.
De conbien ?
S’ai paour qu’il ne t’en meskieche.
Or contés dont chascune pieche.
Ten premier lot, che furent troi.
Hé ! voire.
Et les troi partis de la perte :
Sanie vous che raison aperte ?
Che sont cinc, se je voeil encore,
Et onze m’en presterés ore :
Dis et set sont. Vient bien chis contes ?
Cliket, warde que tu empruntes :
Che pués tu bien de fi savoir
Que je vaurrai bon gage avoir :
Tu iés mout estrains en te cape :
J’ai paour qu’ele ne t’escape
Ains que tu isses de l’ostel.
Ostes, ostes, nous savons el,
En autre lievre gist li bus.
Nous avommes cinc deniers bus,
Faisons les, tout avant, a des.
Qui en a nul ?
D’une vergue, drois et quemuns,
Ja des voes n’en venra uns,
Ne vous en poist mie, Cliquet !
Non fait il. Cha venés, Caignet !
Caignet, ses tu que tu feras ?
Tien, ches des se nous presteras,
S’en pren bien au jeu te droiture.
Il puet caïr tele aventure
Que miex t’en sera, par mon chief !
Cliquet, j’en venrai bien a chief.
Dites, Cliquet, et vous, Rasoir,
Volés vous che vin asseoir,
Ou nous jouerons qui les pait ?
Mais qui en puist avoir, s’en ait !
Qui le mains a si les pait tous !
Caignet, se Diex te doinst le tous,
Car nous prestés ore vos des.
Tenés, Rasoir, si mes gardés :
Jes fi taillier par eschievins.
A cest caup soit fais tous li vins,
Qu’i metriens nous jusc’ a demain.
Dont giet chascuns devant le main.
Jou l’otroi.
Et jou l’otroi bien.
Va, de par Dieu ! sans mal engien,
Segneur, par foy ! G’i voi tous quinnes.
Or me doinst Diex toutes les sines,
Ausi que on les porte vendre !
Ceste caanche est assés mendre,
Pinchedé, que tu gieté as :
A paines i a il nis as.
Bien le doit comprer tes pourpoins.
Pour cinc deniers giete cinc poins :
C’est rieule ; a tant pués tu conter.
Dehait qui te fera geter.
Droit avés, vous li ferés honte.
Or metés dont cest seur vo conte :
Ensi s’acordent bonne gent.
Veus tu jouer a sec argent ?
Oïl, voir.
Ja i ara bourses ouvertes :
Chascuns meche trois les cel bort.
Et qui giet miex, si les emport ;
Je n’i sai riens autre barat,
Et qui deniers n’a, s’en acat.
A quel jeu ?
A quel que tu veus.
A plus poins ?
Soit, si m’aït Diex !
Jou giet, Diex le meche en mon preu !
Atendés, vous i veés peu :
Je voeil que chis caupons i soit.
Bien nous fai et bien pren ton droit,
Ne savons autrement tenchier.
Diex ! Douze poins au commenchier !
Quaernes, deus ! Tu en as dis.
Teus tient les des qui giete pis.
Je te le donroie pour noef.
Dehait qui t’en donroit un oef,
Ne qui de dis perdre le crient !
Alumera on vous pour nient ?
Chis est miens, comment qu’il en kieche ;
Mais on ne m’i hucast a piece :
Dehés ait atrais de tel gent !
Caignés, metés jus no argent,
Tant que nous l’otrions nous troi.
Cliquet, che n’est mie d’otroi.
Ains gastés chi grosse candeille,
Et toute no maisnie veille
Pour vo gieu, aval no maison.
Jou giet ! Segneur, il dist raison.
Rasoir, chi n’atendés vous point ?
Non, car tu l’as passé d’un point.
Or n’a a geter que je seus.
Mais j’en ferai bien onze en deus.
Et li autres soit deboutés.
A ! c’est pour nient que vous getés,
Car che fu en wanquetinois.
Toutes eures preng je ches nois,
Car j’ai quaernes et un sis.
Met jus l’argent, ains qu’il soit pis,
Avant que tu m’escaufes waires.
Et c’as tu qui si m’iés contraires ?
E n’ai je trois poins plus de ti ?
Met jus les deniers, je t’en pri,
Ains que li casee m’esmoeve.
Maudehé ait qui che me roeve,
Puis c’on voit que seur les des vient !
Enne dis jou che fu pour nient ?
Veus le tu avoir par effort ?
Dyables ! Que chis me tient fort,
Pour poi qu’il n’esrache me cape !
Tien de loier ceste soupape !
Je commenç, car mix de ti vail.
Et pour itant le te rebail :
Or pués veoir que je te dout !
Sire, sire, vous perdés tout.
Acourés tost, no wage empirent.
Car cist ribaut tout se descirent,
Et si n’ont drap qui gaires vaille !
Qu’est che, Cliquet ? Est che bataille ?
Laisse le tost, et tu, lais lui !
Si vous alés seoir andui,
Bien ara chascuns se raison.
Rasoir, contés nous l’ocoison,
Vous savés bien li quels a tort.
Sire, bon est c’on les acort,
Car li noise ne me conteke,
Demandés Caignet li quels peke,
Que ja n’i ait de mot menti.
Caignet, il le met bien en ti.
Et jou, ja issir ne m’en quier.
Or metés dont seur l’eschekier
Les deniers, qu’il i soient tuit.
Certes, ves les chi trestout uit,
Or jugiés si comme a ami.
Segneur, vous l’avés mis seur mi :
Sachiés je n’i voeil perdre rien :
Toutes eures sont cist doi mien,
Et les sis partés entre vous.
Car se li uns les avoit tous
Che seroit ja uns mautalens.
Et tu, Cliquet, verse vin ens,
Si donne a boire Pinchedé.
Jel voeil que soiés acordé,
Puisqu’il est en men jugement.
Pinchedé, je le vous ament :
Par acorde le vin vous doins.
Cliquet, et je le vous pardoins ;
Bien sai que vins le vous fist faire.
Segneur, or parlés d’autre afaire,
Si que chaiens chascuns s’aquit.
Il est mout passé de le nuit,
S’est bien tans d’aler a la brune,
Car esconsee est ja li lune,
Et chi ne gaaignons nous rien.
Ostes, car le nous faites bien ;
Un poi de deniers vous devons,
Mais ailleurs le gaaing savons,
Ou mout sera grans li conqués,
Car nous prenderons tout a fés,
La ou nous savons, le tresor.
De grans plates d’argent et d’or
Avra chascuns son col carchiet.
Faire voeil a vous un marchiet
Si bon que ainc ne fistes tel :
Car cha dedens, en vostre ostel,
Soustoiterés nostre gaaing,
Si que vous en serés compaing,
Partirés et jeterés los
Et chi sus querrés nos escos ;
Del paier n’est nule peürs.
Puis jou estre dont asseürs
De chou que Rasoirs chi me conte ?
Sire, se Diex me gart de honte,
De meskeanche et de prison,
C’on ne nous prengne a occoison,
Que nous ne soions tout pendu,
Si tres bien vous sera rendu
Que d’or fin arés plein un bac.
Mais faites nous prester un sac
Ou ens meterons nous l’avoir.
Caignet, fai leur un sac avoir,
Car, se Dieu plaist, bien sera saus.
Tien, Cliquet ! Chis tient deus mencaus.
Alés, que Diex vous ramaint tous !
Ostes, a Dieu ! Priés pour nous,
Que no cose anuit bien nous viegne.
A foi, segneur ! Dieu en souviegne !
Pincedé, Cliquetrasoirs
Pinchedé, tu ses mout de l’art :
Va tost coiement cele part
Pour espier se li roys dort.
Or tost, fil a putain, larron !
Car li roys dort et si baron
Si ferm que s’il fussent tout mort.
Cliquet, peu prisa son catel
Qui a cest cornu menestrel
Commanda si bele ricoise.
Rasoir, che bon escrin pesant
Prendés, car che son tout besant.
A, vif diable ! Que il poise !
Pinchedé, met che sac plus pres :
Chis escrins poise comme uns gres,
Pour un petit qu’il ne me crieve.
Rue chaiens tout a un fais,
N’ai talent que l’escrin i lais.
J’aim miex assés que je m’en grieve.
Chi voeil jeu esprouver me forche,
Ne voeil c’autres de moi l’en porche :
Encarkiés le moi, s’i vous siet.
Preu ! Nous t’aiderons toute voie.
Or nous metons dont a le voie,
Entreus que si bien nous en chiet.
le tavernier, Caignetrasoirs
Ostes, ostes, ouvrés nous l’uis,
Vo sas ne revient mie vuis,
Ne vous volons pas dechevoir.
A foi, bien vegniés vous, segneur !
Or tost, Caignet, aïe leur !
Tes hom fait bien a rechevoir.
Segneur, jou ai eü grant fais :
Che ne seroit mie fourfais
Se je buvoie a ceste laisse.
Dehait qui cest envïal laisse !
Car bons vins tous mes maus aliege.
Segneur, et biau fu et bon siege
Arés vous, onques n’en doutés,
Et vin qui n’est mie boutés,
Ains crut en costiere de roche.
Caignet, abaisse un poi le broche,
Si nous laisse taster au trouble.
Biaus ostes, et candaile double
Nous faites aporter avoec.
Il n’en venra mie senoec.
Si con je pens et adevin.
Segneur, ves chi candaile et vin
Mieudres que il ne fu deseure.
A foi, beneoite soit l’eure
Que si fais vins fu entonnés !
Caignés, or tost nous en donnés,
Car bien seront no gage quite.
Hé, Diex ! con chis vins nous pourfite !
Or primes sommes assenés,
Dehait n’en bevera assés !
Nous avons hanap de biau tour.
Laissiés courre che vin entour !
Je li paierai ja un dap.
Hé, boi, si laisse le hanap !
Ne troeves qui le te deffenge ?
Hé, Diex ! Chi a bonne vendenge,
Mais je n’en puis men soif restaindre.
Rouvés me vous mes des ataindre ?
Oïl, illuec tiengnent lor lieu.
Voir a dit, jouerons bon gieu.
Pinchedé, il est bien ou prendre.
Ba ! Pour jouer et pour despendre
Acreons mes nous seur le hart.
Rasoir, jouerons a hasart ?
J’ai plain poing de mailles de musse.
Oïl, voir, onques ne m’en husse ;
Meche chascuns, a bonne estrine.
Dont soit a hasart, en le mine.
Je prenç ; prengne chascuns le sieue.
Ceste est bien au moy de le tieue.
Et ceste, se g’i seuc lignier.
Segneur, or doi je apongnier ?
Mais mout bien nous en convenra.
Ostes, quant au partir venra,
Bien i sera vo drois gardés.
Rasoir, commenche pour les des.
Ne ja nus l’eschekier ne moeve.
Dehait qui remuer le roeve,
Car il siet le plus droit del mont.
Ains geteroie contremont,
Car il siet plus haut devers ti.
Certes, Cliquet, tu as menti :
Un marc d’or i ait au grant pois.
Met en mi l’eschekier un pois :
Il acourra cha a droiture.
Giete tost, soit en aventure !
Il s’en vont ! Gardés qu’il i a.
Par foi ! Set poins.
Chil deriere vienent du mains.
Rasoir, ains te sue li mains :
Frote le un petit a le pourre,
Si me fai ensi les des courre.
Sissnes, cinc ! J’en ai dis et set !
Honnis soie se je regiet !
Metons, Rasoir, il a les des.
Pour Dieu, Cliquet ! Or i wardés,
Car il set les des asseïr.
A ce jeu doit on cler veïr :
Che n’est mie as aniaus de voirre.
Cliquet, met ci ceste candaile,
Si aras plus clere veüe.
Caignet, a caanche keüe
Aras un denier de chascun.
Mais vous, me donnés de quemun
Trois de ches deniers qui sont rouge.
Avés oï de chel’ augouche ?
Fineroit il ore ja mais ?
Caignet, lais les jouer en pais :
Plus atenç jou en eus de bien.
Ostes, vous n’i perderés rien,
Car je serai chi en vo lieu.
Soiés en pais !
J’ai les des, je giet pour tous cheus.
Giete : Diex le doinst set en deus !
A Dé foit, mais hasart ou seize.
Hasart, Diex !
Or te donriemmes nous hasart.
A Dé foy, segneur, Diex m’en gart !
Escapar, de par saint Guillaume !
C’est pour nient. Tout en mi le paume
Les hocherés, comment qu’il tourt.
Cliquet, or me tiens tu trop court :
Lais me viaus geter, se tu dois.
Giete, en hochant, devant les dois,
Un hasart par me meskeanche.
Ains ai uit poins en me keanche,
C’est miex de hasart toute voie.
Certes, tu te couvris d’un troie,
Es autres deus eut as et quatre.
Or laissiés treize a uit combatre,
Tost ira la ou aler doit.
Voire, honni soient chil doit
Qui si souvent sont remué.
Diex ! Un plus ! S’arai bien joué ;
Set n’eüsse je mie pris.
Or seroient treize de pris
S’il voloient venir a nous !
A, sains Lienars ! Chu desous
Si seroit li affaires plains.
Sains Nicolais ! Un tout seul mains !
Ves chi uit, che sont mi ami.
Puis je tous ches sakier a mi ?
Chi a assés bele couvee.
Pinchedé, je prenç me levee,
Que vous orains me promesistes,
Et mout bien en couvent mesistes
Que che seroit au premier gieu.
Hé ! C’as tu dit, anemis Dieu ?
Ceste levee vaut cent livres !
Cuidas tu dont que je fusse ivres
Quant le levee te promis ?
Che fu au jeu de pairesis,
Quant nous jouames au vin croistre.
Pinchedé, or du bien escroistre !
Je ne t’en donroie deus oés.
Rasoir, enn’est chou a vo oés ?
Oïl, voir ; che cuidiemes nous.
Male leeche en aiés vous,
D’ensi nos deniers esciekier !
De canque il a seur l’eschekier
Seras tu ja mout tost seneuc.
Dont m’en porteras tu avoec,
Par foi, que ja n’en aras mains !
Lais les !
Que je ne te crieve les iex !
Sire, cist resont par cavex :
Oés comme il fierent grans caus !
Que c’est ? Pinchedé, iés tu faus ?
Lai le tost, et tu lui, Rasoir !
Si vous alés andoi seoir !
Bien sai dont li affaires vient :
Metre seur mi vous en couvient,
Ne voeil pas vers vous entreprendre.
Jou l’otroi, sans les besans prendre.
Et jou, mais mout le faç pesans.
Cliquet, pren trestous ches besans.
Si les regetés en che coffre.
Ja n’en arés mains que vo offre ;
Ves les chi tous, je n’i voi el.
Par foi ! Or sommes nous yevel :
Comme devant resoit communs !
Or en prengne se part chascuns !
Que doit que vous tant atendés ?
Ostes, un petit entendés :
Nous sommes auques travilliet,
S’avommes toute nuit veilliet.
Bien partirommes comme ami,
Mais nous arons anchois dormi.
le roi li senescaus
Ahi ! Apolin et Mahom !
Che m’iert ore en avision
Del grant tresor le roi meïsme
Qui ne pooit estre rescous,
Ains fondoit le terre desous,
Si s’en aloit droit en abisme ;
N’iere liés si l’arai veü.
A ! roys, com il t’est meskeü !
Mout est faus qui ne te conseille
Lieve sus, roys desconfortés !
Car tes tresors est emportés.
Qu’est chou ? Par Mahom ! Qui m’esveille ?
Senescal, qu’est che que tu dis ?
Roys, tu iés povres et mendis,
Mais ne le dois nullui requerre,
Quant le grigneur avoir qui fust
Commandas un home de fust.
Ves le la ou il gist, a terre.
Senescal, as me tu dit voir,
Que j’aie perdu mon avoir ?
Che m’a fait li vilains kenus
Qui l’autr’ier me vint sarmonner.
Fai le devant moi amener,
Car ses juïsses est venus.
Durant, le prud’hommeli senescaus
O tu, Durant li charteriers,
Vit encore tes prisoniers ?
Li rois a talent qu’i le voie.
Oïl. Cha vilains ! A vo honte
Je vous ferai ancui sans conte
Passer trois pas de male voie.
Rois, ves le chi ! Ja Dieu ne plache
C’autres de moi justiche en fache :
Je le te pri en guerredon.
le prud’hommeli rois
Vilains, chi a malvais restor
De toi contre mon grant tresor.
Mout m’as chier vendu ton sermon ;
Tes diex ne te puet mais tenser.
Durant, or del bien pourpenser
Cruel mort a sen cors destruire.
Sire, liés sui c’on le me livre.
Je le ferai en morant vivre
Deus jours, anchois que il parmuire.
A ! rois, c’or nel tien en despit,
Car me donnés hui may respit,
C’on ne m’ochie ne travaut.
Encore est Diex la ou il seut,
Qui bien me secourra, s’il veut.
Un jour de respit cent mars vaut :
Mainte guerre en est mise a pais.
Que caut ? Durant, laisse le huimais,
Et le matin le me ramaine.
Arriere, vilain ! Au lïen !
Se fussent ore crestïen
Entré en peneuse semaine !
Durant, l’angeli preudom
Sains Nicolais, bons eürés,
A cest besoing me secourés,
Car venus sui a le parsomme.
Se le forche ont mi anemi,
Au besoing voit on son ami.
Sire, dont secourés vostre home,
Seur cui chis rois païens s’avive !
Ne veut souffrir que je plus vive :
A le matin est mis mes termes,
Se li tresors n’est raportés.
Sire, che dolent confortés
Qui s’ochist en plours et en lermes.
Par Dieu, vilains ! Or i parra
Ancui quant il vous convenra
Aprendre un mestier si peneus.
Peu pris vo dieu et vo apel,
Je vous ferai ja un capel
D’une corde plaine de neus.
Sains Nicolais, le tien secours !
Car chis termines est mout cours
Que chis anemis me promet.
Sains Nicolais, car me regarde !
Je me sui mis en vostre garde
Ou nule chose ne maumet.
Di, va, biaus crestïens ! Tais te, ne pleure !
De che dont iés desous seras deseure.
Prie saint Nicolai qu’il te sekeure,
Et il te secourra en petit d’eure.
Sueffre hardiement te mesestanche,
S’aies saint Nicolai en ramembranche !
Ne te couvient avoir nule doutanche,
Sains Nicolais pourcache te delivranche.
Se tu l’as bien servi de si a ore,
Ne te recroire mie, mais serf encore !
Onques de ceste pluie ne te ressore :
Qui pour Dieu se traveille, bien li restore.
les larronss. nicholais
Maufaiteour, Dieu anemi,
Or sus ! Trop i avés dormi.
Pendu estes sans nul restor :
Mar i emblastes le tresor,
Et l’ostes mal l’a couveillié.
Qu’est chou ? Qui nous a esvillié ?
Diex ! Com je dormoie ore fort !
Fil a putain, tout estes mort,
En l’eure sont les fourques faites ;
Car les vies avés fourfaites
Se vous mon conseil ne creés.
Preudom qui nous a effreés,
Qui iés, qui tel paour nous fais ?
Vassal, je sui sains Nicolais
Qui les desconseilliés ravoie.
Remetés vous tout a le voie,
Reportés le tresor le roy !
Mout par feïstes grant desroi
Quant l’osastes onques penser.
Bien deüst le tresor tenser
L’image qui estoit sus mise.
Gardés tost qu’ele i soit remise,
Que remis i soit li tresors,
Si chier que vous avés vos cors,
Et metés l’ymage deseure.
Je m’en vois sans nule demeure.
larronspincedés
Per signum sancte cruchefis !
Cliquet, que vous est il a vis ?
Et vous, qu’en dites vous, Rasoir ?
Par foi, moi sanle que dist voir
Li preudom, mout m’en est a ente.
Et vis m’est grant dolour en sente,
Ainc mais homme tant ne cremi.
le tavernier, Caignetli ostes
Segneur, je n’en trai nient a mi,
Se vous avés fait desraison.
Mais widiés me tost me maison,
Car n’ai cure de tel gaaing.
Ostes, ja fustes vous compaing,
Puis que che vient au dire voir ;
Et du pechié et de l’avoir
Devés avoir droite parchon.
Or hors, fil a putain, glouton !
Volés me vous blasme acueillir ?
Caingnet, va t’en escot cueillir,
Puis les met hors de mon ostel.
Or cha, Cliquet ! Il n’i a el,
Delivrés vous de ceste cape !
Ja n’iert sans noise ne sans frape
Hom qui si faite gent rechet.
Quans deniers doi jou ?
Cinc du vin et douze du prest.
Ou Pinchedés et Rasoirs est ?
Or laisse te cape pour tout.
Caignet, tu te fais mout estout.
Pour coi ? En’ai je bien conté ?
Encor te fai je grant bonté
Se je daigne te cape atraire.
De gage prendre et de mestraire
N’a ten pareil jusques au Dan !
Or poés aler au lagan !
Segneur, or est pis que devant :
Anemis nous va enchantant
Qui nous cuide faire honnir.
Avoirs puet aler et venir ;
Mais s’on nous escille et deffait,
Nous ne serons ja mais refait,
Honnis soit ore tes marchiés !
Tenés, Pinchedé, rencarchiés !
Tu l’aportas, remporte l’ent !
les larrons se dirigent vers la tente du roi
Ancui verras l’oste dolent :
Il a pis conté qu’il ne cuide,
Car ses sas a fait une vuide
Segneur, or creés m’estoutie !
Prengne chascuns une pugnie
De ches besans : ja n’i parroit !
Tais te, faus ! Il nous mesquerroit,
S’en porriemes estre repris !
Met le chi, car chi fu il pris,
Si remet l’ymage deseure.
Or jus ! Maloite soit li eure
Que je vous encarquai anuit !
Pinchedé, or ne vous anuit !
Mais creés, si fol con je sui,
Que chascuns voit huimais par lui :
Li quels que soit iert eüreus.
Soit, certes !
Car ja mais bien ne nous querroit.
J’ai espiié une paroit
Que j’arai ja mout tost crosee,
Pour le ware d’une espousee
Qu’est en une huche de caisne.
Segneur, et je m’en vois a Fraisne
Un petit dela Gaverele.
Se je puis faire me querele,
Li maires i ara damage.
Cliquet, li mairesse est mout sage,
Si te conistra au passer.
Ne me voeil pas si lonc lasser :
Chi pres, jusqu’à une ruee,
Ai espïet une buee
Que j’aiderai a rechinchier.
Pinchedé, or du bien pinchier !
Diex nous ramaint a plus d’avoir !
A Dieu, Cliquet !
A Dieu, Rasoir !
le sénéchalli rois
A ! Mahom, a bien advertis
Che qu’en dormant m’iert ore a vis,
Et Tervagan a bien l’espele !
Tout faisoie ore a moi venir
Mes hausbarons pour court tenir,
S’avoie couronne nouvele.
Senescal, dors tu ou tu veilles ?
Sire, anchois songoie merveilles,
A bien me soit il despondu !
Mout iere en dormant confortés,
Car li tresors iert raportés
Et li laron ierent pendu.
Ha ! senescal, gardés i viaus !
Sire, mes songes est espiaus,
Car li tresors est revenus
Plus grans que il ne fut emblés.
Che m’est a vis qu’il est doublés,
Et li sains Nicolais gist sus.
Senescal, gabes me tu donques ?
Rois, si grans tresors ne fu onques :
Il a passé l’Octevïen
Tant n’en ot Cesar ni Eracles.
Ostes ! Comme est grans chis miracles !
Alés tost pour le crestien !
Durant, le prud’homme,
les amiraux, la
statue de Tervagantli senescaus
Durant, met le preudome hors,
Il n’a mais garde de ton cors.
Que vaurroit ore li chelers ?
Or cha, vilains ! Mout par fui faus
Qui ne vous pendi par les paus
Et saquai les dens maisselers.
Rois, ves le chi : je le t’amain :
En ton plaisir et en ta main
Est ou del morir ou del vivre.
Sains Nicolais en cui je croi
Ne de toi servir ne recroi,
Garis hui mon cors et delivre !
Pren hui de ton home conroi,
Atempre l’ire de chel roi
Qui mon cors promet a deffaire,
Tant par est seur moi engramis.
Or me di, crestïens, amis,
Crois tu dont qu’il le peüst faire ?
Crois tu qu’i me puist desloier ?
Crois tu qu’il me puist renvoier
Mon tresor ? En iés tu si fers ?
A, rois ! Pour coi ne seroit, kieles ?
Il consilla les trois pucheles,
Si resuscita les trois clers ;
Je croi bien qu’il te puist venquir
Et faire te loi relenquir,
Dont tu dois estre a faus tenus.
En lui sont tout bien semenchié.
Preudom, il a bien commenchié,
Car mes tresors est revenus,
Assés sont li miracle apert,
Puis qu’i fait avoir che c’on pert.
Mais je n’en creïsse nului.
Senescaus, que vaurroit mentirs ?
En lui est mes cuers si entirs
Que ja mais ne querrai autrui.
Certes, rois, parler n’en osoie,
Mais en mon cuer mouût vous cosoie
Que piech’ a le ne m’aviez dit
Que mout grant volenté en ai.
Preudom, va pour saint Nicolai !
Son bon ferai sans contredit.
Diex, aourés en soies tu
Que de te grasce as ravestu
Cest roy qui encontre toi ert !
Sire, faus es qui te mescroit
Et qui de toi servir recroit,
Car te vertus reluist et pert.
Rois, giete te folie puer,
Si te ren de mains et de cuer
A Dieu, qu’il ait de toi pité,
Et au baron saint Nicolai.
Crestïens, crestïens, duel ai
De chou que tant ai respité.
Sains Nicolais, je me rent chi
En te garde et en te merchi
Sans fausseté et sans engan :
Sire, chi devieng jou vostre hom.
Si lais Apolin et Mahom
Et che pautonnier Tervagan.
Rois, tout ensi que tu as fait,
M’ame et mon cors trestom a fait
Doins saint Nicolai le baron,
Si lais Mahom et Apolin,
Tout leur parage et tout leur lin
Et Tervagan, cel ort larron.
Rois, puis que tu convertis iés,
Nous, qui de toi tenons nos fiés,
Aussi nous convertirons nous.
Segneur, metés vous a genous :
Si con je fai, faites tout troi.
Jou l’otroi bien.
Que tout soions bon crestïen,
Saint Nicolai obedïen,
Car mout sont grandes ses bontés.
Segneur, onques ne m’i contés,
Car je n’oç goute a cheste oreille.
Maudehait qui che me conseille
Que je deviegne renoiés !
Al Rois, car fusses tu noiés
Comme falis et recreans
Que devenus iés mescreans !
Fourfait as c’on t’arde ou escorche !
Toi ne ton avoir ne te forche
Ne pris mais vaillant un espi.
Garde de moi, je te deffi,
Et renç ton hommage et ton fief.
Or tost, baron ! Car par mon chief
Je voeil que, maleoit gré soen,
Fache mon plaisir et mon boen :
Metés le a terre par effors.
de terrasser l’amiral d’Orkenie
Or cha, segneur ! Il est mout fors :
Il le nous convenra sousprendre.
Fi, mauvais ! Me cuidiés vous prendre,
Tant que Mahom ches bras me sauve ?
Fuiés, mauvais chevalier fauve !
Poi pris ne vous ne vo engien.
Vous en venrés, car je vous tien !
Rois, ton traïtour, ves le chi !
A, rois ! Pour Mahommet, merchi !
Ne me fai mes diex renoier !
Fai me anchois le teste soier
Ou mon cors a cheval detraire !
Par mon chief ! Il vous convient faire
Si comme moi, che sachiés bien.
Sains Nicolais, c’est maugré mien
Que je vous aour et par forche ;
De moi n’arés vous fors l’escorche ;
Par parole devieng vostre hom,
Mais li creanche est en Mahom.
Palas aron ozinomas
Baske bano tudan donas
Geheamel cia orlaÿ
Berec he pantaras taÿ.
Rois, que voloit il ore dire ?
Preudom, il muert de duel et d’ire
De che c’a Dieu me sui turkiés ;
Mais n’ai mais soing de son prologe.
Senescal, de le synagoge,
Alés, si le me trebuchiés !
Tervagan, du ris et du pleur
Que feïstes par vo doleur
Verres par tans la prophesie :
Ces escaillons me mescontés !
Or jus ! Mal soiés vous montés !
Ne vous prisons une vessie.
Rois, je l’ai mout mal atisiet !
Preudons, or serons baptisiet,
Si tost que nous porrommes plus :
De Dieu servir me voeil vanter.
A Dieu dont devons nous canter
Huimais : Te Deum laudamus.
Bodiaus fist.