Les Amours (1553)/Poème 157
Les amours de P. de Ronsard Vandomois, nouvellement augmentées par lui, & commentées par Marc Antoine de Muret. Plus quelques odes de l'auteur, non encor imprimées
chez la veuve Maurice de la Porte, (p. 190-191).
Puissai-je avoir cette Fére aussi vive
Entre mes bras, qu’elle est vive en mon coeur :
Un seul moment gariroit ma langueur,
Et ma douleur feroit aller à rive.
Plus elle court, & plus elle est fuitive,
Par le sentier d’audace, & de rigueur,
Plus je me lasse, & recreu de vigueur,
Je marche apres d’une jambe tardive
Au moins ecoute, & ralente tes pas :
Comme veneur je ne te poursui pas,
Ou comme archer qui blesse à l’impourveüe :
Mais comme ami piteusement touché
Du fer cruel, qu’Amour m’a decoché,
Faisant un trait des rais de ta veüe.