Les Chroniques de Sire Jean Froissart/Livre I, Partie I/Chapitre CCXCI
CHAPITRE CCXCI.
On doit bien croire et supposer que là où il avoit tant des vaillans hommes, et si grand’multitude de peuple, et où tant et telle foison de la partie des François en demeurèrent sur la place, qu’il y eut fait ce soir plusieurs grands appertises d’armes, qui ne vinrent mie toutes à connoissance. Il est bien vrai que messire Godefroy de Harecourt, qui étoit de-lez le prince et en sa bataille, eut volontiers mis peine et entendu à ce que le comte de Harecourt son frère eût été sauvé ; car il avoit ouï recorder à aucuns Anglois que on avoit vu sa bannière, et qu’il étoit avec ses gens venu combattre aux Anglois. Mais le dit messire Godefroy n’y put venir à temps ; et fut là mort sur la place le dit comte, et aussi fut le comte d’Aumale son neveu. D’autre part le comte d’Alençon et le comte de Flandre se combattoient moult vaillamment aux Anglois, chacun dessous sa bannière et entre ses gens ; mais ils ne purent durer ni résister à la puissance des Anglois, et furent là occis sur la place, et grand’foison de bons chevaliers et écuyers de-lez eux, dont ils étoient servis et accompagnés. Le comte Louis de Blois et le duc de Lorraine son serourge, avec leurs gens et leurs bannières, se combattoient d’autre part moult vaillamment, et étoient enclos d’une route d’Anglois et de Gallois, qui nullui ne prenoient à merci. Là firent eux de leurs corps plusieurs grands appertises d’armes, car ils étoient moult vaillans chevaliers et bien combattans ; mais toutes fois leur prouesse ne leur valut rien, car ils demeurèrent sur la place, et tous ceux qui de-lez eux étoient. Aussi fut le comte d’Aucerre, qui étoit moult vaillant chevalier, et le comte de Saint-Pol, et tant d’autres que merveilles seroit à recorder.