Les Chroniques de Sire Jean Froissart/Livre I, Partie I/Chapitre XIII
CHAPITRE XIII.
La venue de la roine d’Angleterre, qui descendoit en Hainaut, étoit bien sçue en l’hôtel du bon comte Guillaume de Hainaut, qui lors se tenoit à Valenciennes, et messire Jean de Hainaut son frère ; et sçut le dit messire Jean l’heure qu’elle vint en l’hôtel monseigneur d’Aubrecicourt. Il, qui étoit moult honorable, jeune et désirant d’acquérir honneur et prix, monta erraument à cheval, et se partit à privée menée de Valenciennes, et vint ce soir à Buignicourt ; et fit à la roine d’Angleterre toute l’honneur et révérence qu’il pût, car bien le savoit faire.
La dame, qui étoit moult triste et moult égarée, lui commença à conter en pleurant moult piteusement ses douleurs et ses mésavenues : comment elle étoit déchassée d’Angleterre, et son fils, et venue en France sur l’espoir et fiance de son frère le roi ; et comment elle cuidoit être pourvue de gens d’armes de France, par la bonne volonté et conseil de son frère, pour aller plus puissamment et emmener son fils en son royaume, si comme ses amis d’Angleterre lui avoient mandé ; et comment son frère fut tellement conseillé depuis, comme vous avez ouï ; et lui conta comment et à quel meschef elle étoit là affuie atout son fils, comme celle qui ne savoit à qui ni en quel pays trouver confort ni soutenance.