Par le sang bieu ! c’est ung Breton,
Et je dy que je suis Francoys !…
Il est fait de toy, ceste fois,
Perrenet ; c’est ung parti contraire !
Hen, Dieu ! et où voulez-vous traire ?
Vous ne sçavez pas que vous faictes.
Dea ! je suis Breton, si vous l’estes.
Vive sainct Denis ou sainct Yve !
Ne m’en chault qui, mais que je vive !
Par ma foi ! Monseigneur mon maistre,
Se vous voulez sçavoir mon estre,
Ma mère fut née d’Anjou,
Et mon père je ne sçay d’où,
Sinon que j’ouy reveler
Qu’il fut natif de Lantriquer.
Comment sçauray-je vostre nom ?
Monseigneur Rollant, ou Yvon,
Mort seray quand il vous plaira !
Et comment ! il ne cessera
Meshuy de me persecuter,
Et si ne me veult escouter !
En l’honneur de la Passion
De Dieu, que j’aye confession,
Car je me sens jà fort malade !
Or, tenez, velà ma salade,
Qui n’est froissée ne couppée ;
