« Et .l. mars d’or avec li renderay ;
« Et tout li autre ausi [que] travaillié tant ay,
Chascuns avra coursier de moy ou cheval bay,
« Avecques .xx. mars d’or que chascun lesseray. »
Et quant Butor ot dit a sa gentil mouiller
Les dons qu’il vouloit faire a chascun chevalier,
Elle li dit : « Butor, ne vous veille anoier,
« Il sont a vous venu pour vo feste essaucier,
« Et s’a porté Bruiant, doucement, sans noissier,
« Ou bois de Bersillant vo fil sur le gravier
« Si que vous l’en rendes asés petit louier,
« Car loiaument l’a fait de bon cuer et entier,
« Si que vous l’en devez amer et tenir chier,
« Quant il aida vo fil son bien a pourchacier.
— Dame, » ce dit Butor, « il l’avra tout entier
« Tout ce que j’ai proumis, mais veilliez li baillier
« Autretant de par vous, s’en ferés a prissier.
— Sire, » ce dit la dame, « et je vueil afïer
« C’autretant en avra après mon descouchier. »
Quant Butor fu levés et la dame ensement,
En son palais manda errant toute sa gent,
Et il i sont venus tout amoureussement ;
Et quant Butor les vit devant lui en present,
Si leur a dit : « Seigneur, mes cuers graces vous rent
« De l’onneur qu’avés fait a moy premiérement,
« Et a ma fame ausi qui moult a le cors gent.
« Vous vous en irés tous en vostre tenement,
- ↑ — 2599. i, ms. li.
