Et il leur a donne de cuer sans atargier.
Butor les convoia et .l. escuier
Jusqu’au bois Bersillant sans voulenté changier.
Trestout li cent baron s’en tornérent arrier ;
Mais pour l’amour Bruiant leur pot moult anoier,
Qui aloit en litiére et ne pot chevauchier,
Car Butor l’a voit [fait] au cheoir tout froissier.
Tout ainsi que Bruians chevauchoit ou chemin,
Par dedens sa litiére, et que doy fort romcin
Le portoient en air, sans noisse et sans hutin,
Il s’est fait metre jus droit par desous .j. pin
Qui estoit a un lés acostés d’un sapin,
Et a l’autre costé avoit .j. aubespin.
Il apela Butor d’umble cuer et benin,
Et dit : « Sire Butor, tant avés le cuer fin
« C’om ne vous doit faillir en noisse n’en hutin.
« Nous nous sommes parti de vous a ce matin ;
« Sire, vous en irés en vo palais marbrin,
« Et nous recomandés de bon cuer enterin
« A ma dame plaissant cui Diex doint bonne fin !
« Nous avons cuer et corps a son vouloir enclin. »
Bruiant donna congié a Butor son seigneur,
A cuy il devoit foy et hommage et honneur,
Et dit : « Sire Butor, je sans moult de douleur,
« Si soies tous certains que de mourir ai peur.
« Ge vous ai en couvent que, par mon createur,
