« Pour ce que j’ai perdu la plus lealle amie
« Qui fust onques veüe en nul jour de sa vie,
« La meilleure, la plus belle et la miex enseignie :
« C’est ma mére de lait qui ne me heoit mie,
« Si que pour ce fais je la chiére si marrie. »
Quant la dame l’oy si en fu effr[e]ée
Car bien pensoit avoir de lui la desevrée.
Si li a dit : « Biax filz, s’il ne vous desagrée,
« Je vous dirai pour quoy elle s’en est alée :
« Pour ce que vous l’avés rudement apellée ;
« Et si n’est pas par vous moult granment amendée,
« Car vous la deüssiés bien avoir mariée
« Pour ce qu’avec vous a conversé mainte année ;
« Si est a vous norrir povrement recouvrée,
« Si que par cest point ci s’en est elle tormentée.
« Mais s’elle puet par vous ennuit estre trouvée,
« Je vous en pri pour Dieu que bien soit asenée.
— Dame, » respondi Bruns, « or ne soiés irée,
« Car je sai bien comment la chose est demenée,
« Et si m’a tout par li la chose esté comtée :
« Elle m’a dit ainsi que j’ai tel destinée
« C’une dame sera de mon cuer bien amée,
« Et si sera s’amour fause et fainte aprouvée,
« Ne ja de sa merci n’avrai poitevinée,
« Et si sera de moi mainte paine endurée. »
Quant la dame l’oy, si chaï jus paumée,
Car elle savoit bien qu’en la propre journée
Seroit l’amour de lui et d’elle desevrée.
Et Brun de la Montaigne l’a errant relevée,
Et si l’a doucement baissiée et acolée.
- ↑ — 2936. Suppr. en, ou corr. el ou tornée. — 2939. iriée. — 2949. d’elle, ms. de moy.
