Et quant li chevaliers se sent ainsi ferus,
Il li dit : « Escuiers, a vous me sui rendus. »
En Brun de la Montaigne ot escuier trop fort :
Li hideus chevaliers y ot mauvès resort,
Et le vint asaillir sans raison et a tort ;
Mais s’il n’eüst prié merci il l’eüst mort,
Et il perdi .j. bras et puis furent d’acort,
Si c’onques puis n’i ot ne tençon ne descort.
Si que li chevaliers rendi a Brun s’espée,
Pour .j. bras qu’il perdi fu la guerre finée,
Si c’om ot de lui pais par toute la contrée,
Car devant n’i povoit avoir nus hons durée ;
Et fu ses chevaus mort, dont il ot chiére irée.
Si s’en rala a piet, tout parmi la valée,
A un petit chastel qui seoit en la prée.
Et Bruns est remontés en la selle dorée.
Li autres chevaliers cui donna la colée
Li a dit : « Sire dous, veés la Tour ferrée.
« Tous seulz vous en irés, ma voie est retornée
« Puisque de vous .ij. est la bataille finée.
« Vous venrés assez tost a la grant Tour quarrée,
« Et la trouverés vous mainte dame honnorée,
« Mainte jonne pucelle et mainte marïée.
« Ma dame i trouverrés, bien la plus belle née
« Qui onques nul jour fu de nul homme engerrée.
« Il n’est nus, s’il le voit, qui n’ait en li muée,
« Par le plaissir d’amour, amoureusse pensée.
— Sire, » respondi Bruns, « s’il vous plaist et agrée,
« Que me dites pour Dieu comment elle est nommée ?
- ↑ — 3517. cui, ms. qui.
