Che sera grant damage, se rois Gharssilles l’a,
Car c’est li plus hideux c’oncques Jhesus fourma, »
Enssi se deviserent, et li boins rois l’ama.
Daléz lui les assist, grant honneur leur porta ;
S’il furent bien siervit, ne le demandés ja,
Car li boins empererez a se gent conmanda
C’on siervist les barons de tout che qu’il y a,
Et on le fist ensi conme il le conmanda.
D’autre part fu Flourenche, que Jhesus ordonna
Enssement que pour lui, car en Paradis l’a ;
Sainte est en Paradis, li papes l’esleva
Et le fist mettre en fiettre, a Ronme l’essaucha.
Moult fu bielle Flourenche et bien endoctrinee,
A sa table seoit moult noblement paree,
Sis chevaliers le siervent au mengier la journee ;
Moult estoit la puchelle viemeille et coullouree,
Bien fu des messagiers la bielle rewardee.
Quant vint apriesdisner, la bielle s’est levee,
Viers sa chambre royal est la puchielle alee.
Uns gentieuz chevaliers, qui fu de la contree,
Qui le parolle avoit bien dou roy escouttee,
Vint a Flourenche droit en sa chambre pavee.
« Dame », dist li vassaux, « vous seréz mariee :
Venus sont li barons qui vous ont demandee
Pour Gharssilles, le roy d’outre le mersalee.
Or seréz vous de Gresse roÿnne couronnee
Et en Coustantinoble siervie et honnouree. »
Quant la bielle l’oÿ, si fu toutte effraee ;
Lors dist au chevalier a moult basse alenee :
« Biaus sire, dittez moy, si vous plaist et agree,
Se mes peres li rois a le chose acordee.
— Dame », dist il, « nennil ! Mès ainschois la viespree
- ↑ 410 Deuiers :
