Si voit on bien souvent qu’elle en ot repentie.
Sire, drois empererez, voléz que je vous-die ?
Flourenche ameroit mieus yestre en un feu bruye
Qu’elle fust a Gharssille donnee ne pleuvie,
Car il nous est avis, pour voyr je vous affie,
Que ceste chose chi si n’est point bien partie. »
Oille li empererez, tous li sans li fremie :
« Elle est dont a vous tous », dist li roys, « consillie ?
Chiertez, je n’en say nient, par me chevalerie.
— Sire », dist Agrevains, « ne vous courouchiés mie,
Car il avient moult bien en aulcune partie
C’uns enffez, quant il est de maniere abaubie,
Diroit a un estraigne, la ou elle se fie,
Che qu’a pere n’a mere elle ne diroit mie. »
« Signeur », ce dist li rois o fier contenement,
« Bien voy que vous conssaux ne ç’aporte noyent
Que Florence, me fille, ait en mariement
Le riche roy Gharssille, qui est fiers durement ;
Et, puis qu’il ne vous plaist, je ay Dieu en couvent
Que ja ne li donray ainssi ne aultrement,
— Sire », dist Agrevain, « par le mien loement,
Ne le ferés vous ja, se bien ne s’i assent
Flourenche, vostre fille, qui de biauté resplent.
Bien em poéz a lui faire le parlement,
Et, se c’est li siens grez, c’est li nos enssement. »
Dont dist li empererez : « Vous parlés sagement. »
Viers le cambre sa fille ala isniellement,
Ylioecques le trouva plourant moult tenrement ;
Et Audeghons, se dame ; le doctrine et reprent :
A tant es vous le roy qui le vit clerement :
« Ma fille », dist li rois, « trop me faittes dolent
- ↑ 531 sa porte — 534 jay d. — 536 Sire che d. — 542 Deuiers.
517 e. vous que
