Li cours s’i resbaudi a forche et a bandon,
Dames et damoizielles, dont il avoit foison,
Conmenchierent le fieste par tel devision
Que moult font grande joie chevalier et baron
Et Flourenche meïsmes, qui clere ot le fachon.
Millez et Esmeréz, qui furent damsillon,
Ont prise la puchielle cascuns par le geron,
Douchement l’ont menee a se devision ;
Volentiers en souffry le fait et l’occoison.
Grande fu li honneurs a le departison.
Or se party li cours dont je vous voy parlant.
Milles et Esmeréz, qui furent avenant,
Convoiierent Flourenche, ou de biauté ot tant ;
De chi jusqu’a sa cambre sont alé li enffant.
Au departir le vont douchement enclinant,
Et la bielle leur va moult biel congiet donnant
Et les va de ses yeus douchement convoyant,
Et chil s’en vont couchier, qui moult furent joyant ;
Par dedens unne chambre, ou li lit furent grant,
La se vont de la bielle douchement devisant.
Puis alerent a court l’endemain repairant,
Mais n’y furent qu’un poy quant on va la criant
Que Garssilles li roïs va le paÿs fustant
Et le chité de Ronme aloit moult aprochant.
Et quant li empererez en sot le couvenant,
Il conmande a se gent c’on se voist adoubant
Et que tout soient prest, chevalier et siergant,
Pour yssir hors de Ronme dou tout a son conmand ;
Et chil le font ainssi, ne si vont detriant.
Or diray de Gharssille, le felon soudoyant,
Qu’’a cent milles Grigois venoit Ronme aprochant.
- ↑ 837 departi — 842 se sont — 844 que .i. — 846 Et que le — 853 Qui a.
823 habandon — 824 ot f. — 829 pris
