« Signeur », dist li espie, « plus ne l’iray chelant :
Demain aréz l’assault apriès soleil levant.
Or aiiiés boin consseil, aléz vous advisant ! »
Dont parla Esmeret haultement en oyant :
« Signeur baron », dist il, « par Dieu le royamand,
Qui croire me volroit, n’attenderiens point tant
Que li assaus alast le chité cuvriant ;
Anschois ysteriens hors qu’il venissent avant,
Car on dist biens parlers, c’on voit bien apparant,
Que plus s’en fuit li homs, plus le va on cachant,
Il nous tiennent pour mors, ne nous prisent un ghant,
Qu’esbahis en seront trestout li plus poissant,
— Frere », che dist Millon, « vous aléz bien parlant. »
Puis a dit coiement : « Foy que doy saint Amand,
Se je puis esploittier et vous aléz yssant,
Ja mais n’y rentreréz en jour de vo vivant !
Or furent tout d’acord li baron chevalier
D’issir de la chité au point de l’esclairier.
Il ont celle nuit fait par la chité nonchier
Que trestout soient prest pour estour conmenchier,
Ossi tos qu’il oront le trompe grelloyer.
La chité firent bien Ronmain autour ghaittier
Jusques a l’endemain, qu’Esmeréz au vis fier
Fist les trompes sonner et le ville chierquier.
Ains le solleil levant fist si appareillier
Qu’il yssirent de Ronme pour Gharsille esvillier.
Esmeréz fu arméz sur le courant destrier.
Et Millon par daléz, qui ne lot mie chier.
Sansses et Agravains, Clarion et Richier
Menoient l’avangarde pour les Grieus mesaisier.
Grigois furent armet pour assault conmenchier,
- ↑ 1571 aront — 1574 F. sonner les trompes — 1580 les griess.
1554 Adont — 1562 tr. le — 1564 que je — 1566 renterez
