Quitiés lez à Gharssilles, ne vous mentiray ja,
Pour l’amour d’Esmeret, que forment honnera.
Et vous, sire Millon, vos frerez me parla
C’on tiengne le respit a chiaus dauléz de cha
Deschi jusqu’a demain que solaus clinera. »
Quant Milles l’entendi, en estant se leva,
A se vois, qu’il ot clere, haultement li cria :
« A chevaus ! A chevaus monter nous couvenra,
S’iray contre mon frere, puis qu’il revient de cha,
Et vous, ma bielle soer, venir vous y fauldra. »
Lors Flourence la bielle, qui fourment couvoitta
De veïr son amy, que par amours ama,
Crut le consseil Millon, se se repentira.
Milles fist son cheval vistement ensieller,
A Flourence fist tos un palefroy livrer,
Et li barons a Ronme, que oÿrent compter
Qu’Esmeréz revenoit, qui tant fist a loer,
Et qu’as Grigois ot fait le respit acorder,
Adont font leur chevaus vistement aprester ;
Qui mieux mieux sont yssus li demaine et li per.
Mais Milles li traïttres fist la bielle haster,
Hors de Ronme est yssus, si prist a pourpensser
En quel lieu il poroit la puchielle mener,
Adfin c’on ne le puist veïr ne retourner.
Par le frain le saisi, se li dist hault et cler :
« Dame, nous devons Dieu, men signeur, bien loer,
Qui nous fait enssement Esmeret ramener.
— Ch’est voirs », che dist Flourence, qui le viaire ot cler,
« Car c’est le riens au monde que plus puis dezirer.
— Dame », che dist Millon, « ou nous porons aler
La u nous le puissons le plus tos encontrer ?
- ↑ 2367 Et quant — 2369 Et qua — 2371 demain — 2377 Dieu manque.
2361 Et v. et ma
