« Deo sa li voir, la voira maesté,
« Se contra to honor eo fi uncha peçé
« Ne sa ma l’avi en cor ni en pensé. »
Dist li rois : « De nient parlé.
« Atrové estes in le mortel peçé
« Si que escuser de ço ne vos poé.
« De vestra arma or vos porpensé ;
« Vestra justisia est ça ordené.
« Qui fal à son segnor doit eser brusé. »
Dist la dama : « Vu fari gran peçé. »
Dist Machario : « El vos torna à vilté
« Quando cun le tanto derasné. »
N. l’oldi, si n’oit le çevo corlé
Et infra soi planero conselé :
« Questa justisia çer sera compré ;
« Mal vera K. de Gaino li parenté,
« Qe senpre l’oit traï et engané. »
li enperer à cui França apant
De Blançiflor el fo gramo e dolant.
Plus la amoit de ren qe fust vivant ;
Mais por la justisie non poit aler avant
Qe de le non faça çuçement,
Tutol malgré, qi s’en rie ni çant.
