secius et ipsa fallacie germanitatis inducta ; et in sororis sceleratas nuptias æmula festinavit ad scopulum : inque consimile mortis exitium cecidit.
Interim dùm Psyche quæsitioni Cupidinis intenta, populos circuibat ; ille vulnere lucernæ dolens, in ipso thalamo matris jacens ingemebat. Tunc avis peralba illa Gavia, quæ super fluctus marinos pinnis natat, demergit sese properè ad oceani profundum gremium. Ibi commodùm Venerem lavantem natantemque propter assistens, indicat adustum filium ejus gravi vulneris dolore mœrentem, dubium salutis jacere : jamque per cunctorum ora populorum rumoribus convitiisque variis omnem Veneris familiam malè audire : quòd ille quidem montano scortatu, tu verò marino natatu secesseritis. Ac per hoc non voluptas ulla, non Gratia, non Lepos, sed incompta, et agrestia, et horrida cuncta sint : non nuptiæ conjugales, non amicitiæ sociales, non liberûm charitates, sed enormis inluvies, et squalentium fœderum insuave fastidium. Hîc illa verbosa et satis curiosa avis, in auribus Veneris filii lacerans existimationem, ganniebat.
At Venus irata solidum exclamat repentè : Ergò jam ille bonus filius meus habet ami-
