causificantem, certusque aliquod moliri flagitium, potionem quidem dedi : sed futuræ quæstioni præcavens, non statim pretium quod offerebatur accepi. Sed, ne fortè aliquis, inquam ; istorum quos offers aureorum, nequam vel adulter reperiatur : in hoc ipso sacculo conditos eos, annulo tuo prænota : donec altera die nummulario præsente comprobentur. Sic inductus, signavit pecuniam, quam exinde, ut iste repræsentatus est judicio, jussi de meis aliquem curriculò taberna promptam afferre, et en ecce, prolatam coràm exhibeo, videat, et suum sigillum recognoscat. Nàm quemadmodum ejus veneni frater insimulari potest, quod iste comparaverit ? Ingens exinde verberonem corripit trepidatio : et in vicem humani coloris succedit pallor infernus ; perque universa membra frigidus sudor emanabat. Tunc pedes incertis alternationibus commovere : modò hanc, modò illam partem scalpere capitis : et, ore semiclauso balbutiens, nescio quas affanias effutire : ut eum nemo prorsus à culpa vacuum meritò crederet. Sed revalescente rursus astutia, constantissimè, negare, et arcessere mendacii medicum non desinit.
Qui præter judicii religionem, cùm fidem
