suam coràm lacerari videret : multiplicato studio verberonem illum contendit redarguere, donec jussu magistratuum ministeria publica, contrectatis nequissimi servi manibus, annulum ferreum deprehensum cum signo sacculi conferunt, quæ comparatio præcedentem roboravit suspicionem. Nec rota, vel eculeus, more Græcorum, tormentis ejus apparata jàm deerant, sed obfirmatus mira præsumptione, nullis verberibus, ac ne ipso quidem succubuit igni.
Tunc medicus : non patiar, inquit, hercules, non patiar, vel contrà fas de innocente isto juvene supplicium vos sumere : vel hunc, ludificato nostro judicio, pœnam noxii facinoris evadere. Dabo enim rei præsentis evidens argumentum, nam cùm venenum peremptorium comparare pessimus iste gestiret : nec meæ sectæ crederem convenire, causas ulli præbere mortis : nec exitio, sed saluti hominum medicinam quæsitam esse didicissem : verens, ne si daturum me negassem, intempestiva repulsa viam sceleri subministrarem : et ab alio quopiam exitiabilem mercatus hic
