AUX LECTEURS
oicy le larron Promethée, qui, au lieu de grâce, demande gré de son crime, et
pense vous pouvoir justement faire présent de ce qui n’est pas à luy, comme ayant desrobé pour vous ce que son maistre vous desroboit à soy-mesme ; et, qui plus est, ce feu que j’ay volé mouroit sans air ; c’estoit un flambeau sous le muy. Mon charitable peché l'a mis en évidence : je dy charitable à vous et à son autheur. Du millieu des extremitez de la France et mesme de plus loing, notamment d’un vieil pasteur d’Angrongne, plusieurs escripts secondoient les remonstrances de vive voix par lesquelles les serviteurs de Dieu luy reprochoient le talent caché, et quelqu’un en ces termes : « Nous sommes ennuyez de livres qui enseignent ; donnez nous-en pour esmouvoir, en un siècle où tout zèle chrestien est pery, où la différence du vray et du mensonge est comme abolie, où les mains des ennemis de l’Eglise cachent le sang du-
