La roïne bien les connut :
A une part du renc s’estut,
Ele et Brengain. Et Andrez vint
Sor son destrier, ses armes tint ;
Lance levee, l’escu pris,
A Tristran saut en mié le vis.
Nu connoisoit de nule rien,
Et Tristran le connoisoit bien.
Fiert l’en l’escu, en mié la voie
L’abat et le braz li peçoie.
Devant les piez a la roïne
Cil jut sanz lever sus l’eschine.
Governal vit le forestier
Venir des tres, sor un destrier,
Qui vout Tristran livrer a mort
En sa forest, ou dormoit fort.
Grant aleüre a lui s’adrece,
Ja ert de mort en grant destrece.
Le fer trenchant li mist el cors,
O l’acier bote le cuir fors.
Cil chaï mort, si c’onques prestre
N’i vint a tens ne n’i pot estre.
Yseut, qui ert et franche et sinple,
S’en rist doucement soz sa ginple.
Gerflet et Cinglor et Ivain,
Tolas et Coris et Vauvain
Virent laidier lor conpaignons :
« Seignors, » fait Gaugains, « que ferons ?
Li forestier gist la baé.
Saciez que cil dui sont faé.
Ne tant ne quant nes connoisons :
Or nos tienent il por bricons.
Brochons a eus, alons les prendre.
Page:Béroul - Le Roman de Tristan, par Ernest Muret, 1922.djvu/144
Cette page a été validée par deux contributeurs.
