cognoistre ce que estoyt de l’amour, mais l’auroyt cogneu en l’aultre sans la métamorphose de la chair qui le guaste, suyvant messire Plato, homme d’authorité, mais qui, pour ce que il n’estoyt chrestien, ha erré. Las ! ces préparatoires discours sont digressions oisives et fastidieux commentaires, desquels les mescreans obligent ung homme d’entortiller ung conte, comme ung enfant dedans ses langes, alors qu’il debvroyt courir tout nud. Le grant diable leur donne ung clystère avecques sa fourche triple rouge ! Ie vais tout dire sans ambaiges.
Ores, vécy ce qui advint à l’orphebvre dans la quarante et uniesme année de son aage. Ung iour de Dieu, se pourmenant en la rive gauche de la Seyne, il s’adventura, par suite d’ung pensier de mariaige, iusques en la prairie qui depuis feut nommée la Prée aux Clercs, laquelle estoyt lors dans le domaine de l’abbaye de Sainct-Germain, et non en celluy de l’Université. Là, tousiours marchant, le Tourangeau se veit en pleins champs, et feit la rencontre d’une paouvre fille, laquelle, l’advisant bien guarny, le salua, disant : « Dieu vous saulve, monseigneur ! » En ce disant, sa voix eut telles doulceurs cordiales, que l’orphebvre sentit ses esperits ravis par ceste mélodie féminine et conceut de l’amour pour la fille, d’autant que, chatouillé de mariaige comme il estoyt, tout concordoyt à la chouse. Néantmoins, comme il avoyt ià dépassé la garse, point n’osoyt revenir, pour ce que il estoyt timide comme une fille qui mouroyt dedans ses cottes par avant de les lever pour son plaisir ; ains, quand il feut à ung get d’arc, il pensa que ung homme receu depuis dix ans maistre orphebvre, devenu bourgeoys et qui avoyt deux fois l’aage d’ung chien, pouvoyt bien veoir ung devant de femme, s’il en avoyt phantaisie, d’autant que son imagination luy trepignoyt bien fort. Doncques il vira net comme s’il changioyt de visée pour sa pourmenade, puis reveit ceste fille qui tenoyt par une vieille chorde sa paouvre vache, laquelle broutoyt l’herbe venue en la lizière verde d’ung fossé iouxtant le chemin.
— Ah ! ma mignonne, feit-il, vous estes bien peu guarnie de bien, que vous faictes ainsy œuvre de vos doigts le iour de Dieu. Ne redoubtez-vous point d’estre mise en prison ?
— Monseigneur, repartit la fille en abaissant les yeulx, ie n’ay rien à craindre, pour ce que ie appartiens à l’abbaye. Le seigneur abbé nous ha baillé licence de pourmener la vache après vespres.
