viefve, la patronne de Paris et des filles qui vivent ez champs. Et comptez que ce cocquebin tout neuf de la teste aux pieds soupçonnoyt la iolie danrée blanche des tettins de ceste fille, lesquels estoyent, par graace pudicque, bien soigneusement couverts d’ung maulvais drapeau, et les appetoyt comme un escholier appète une pomme rouge pour ung iour de chaleur. Aussy, comptez que ces bons brins de naturance denotoyent une garse complectionnée en perfection délicieuse, comme tout ce que possédoyent les moynes. Ores, tant plus il estoyt deffendu aux bourgeoys d’y touchier, tant plus l’eaue luy venoyt en la bouche de ce fruict d’amour, et le cueur luy saultoyt iusques dans la gorge.
— Vous avez une belle vache, feit-il.
— Soubhaitez-vous ung peu de laict ? respondit-elle. Il faict si chauld en ces premiers iours de may ! Vous estes bien esloingné de la ville.
De faict, le ciel estoyt pers, sans nuées, et ardoyt comme une forge ; tout reluisoyt de ieunesse, les feuilles, l’aër, les filles, les cocquebins ; tout brusloyt, estoyt verd et sentoyt comme baulme. Ceste offre naïfve, sans espoir de retour, veu que ung besant n’eust point soldé la graace espéciale de ceste parole, puis la modestie de geste, par lequel se vira la paouvre garse, estraingnit le cueur de l’orphebvre, qui eust voulu pouvoir mestre ceste fille serfve en la peau d’une royne et Paris à ses pieds.
— Nenny, ma mye, ie n’ay point soif de laict, mais de vous, que ie vouldroys avoir licence d’affranchir.
— Cecy ne se peut, et ie mourray appartenant à l’abbaye. Vécy ung bien long temps que nous y vivons de père en fils, de mère en fille. Comme mes paouvres ayeulx, ie passeray mes iours sur ceste terre, et aussy mes enfans, pour ce que l’abbé ne nous laisse point sans gesine.
— Quoy ! feit le Tourangeau, nulle guallant ne ha tenté pour vos beaulx yeulx de vous achepter la liberté, comme i’ay achepté la mienne au Roy.
— Vère, elle cousteroyt trop chier ! Aussy ceulx auxquels ie plais à la prime veue s’en vont-ils comme ils viennent.
— Et vous n’avez point songié à gaigner ung aultre pays en compaignie d’ung amant à cheval sur ung bon coursier ?
— Oh ! bien. Mais, monseigneur, si ie estoys prinse, ie seroys au moins pendue, et mon guallant, feust-il ung seigneur, y perdroyt plus d’un domaine, oultre le reste. Ie ne vaulx pas tant de
