seigneur, sçaichant que la bourgeoyse avoyt quelques lentilles faciles à recognoistre. Doncques, tournez-vous ung petit, à ceste fin que ma chiere dame satisfasse aux convenances.
La bonne femme soubrit à son amy, le baisa pour sa dextérité, s’attifa dextrement, et le mary, voyant en plein ce que sa gouge ne luy laissoyt iamais veoir, feut entièrement convaincu que nul Angloys ne pouvoyt estre ainsy contourné, soubz poine d’estre une délicieuse Angloyse.
— Oui, seigneur, dit-il à l’aureille de son lieutenant, ce est bien une dame de la Court, veu que ceulx de nos bourgeoyses ne sont pas de si haulte futaye, ni de si bon goust.
Puis, la maison fouillée, nul Angloys ne s’y treuvant, le bon prevost revint, comme le luy avoyt dict le connestable, en l’hostel du Roy.
— Est-il occis ? feit le connestable.
— Qui ?
— Celluy qui vous provignoyt des cornes au front.
— Ie n’ay veu qu’une femme au lict de ce seigneur, lequel estoyt fort en train de se resiouyr avecques elle.
— Tu has bien veu de tes yeulx ceste femme, mauldict cornard, et tu ne has point deffaict ton corrival ?
— Non pas une femme, mais une dame de la Court.
— Veu ?
— Et sentu dans les deux caz.
— Qu’entendez-vous par ces paroles ? feit le Roy, qui s’esclatta de rire.
— Ie dis, sauf le respect deu à Vostre Majesté, que j’ai verifié le dessus et le dessoubz.
— Tu ne cognoys doncques pas la physionomie des chouses de ta femme, vieil outil sans mémoire ? Tu mérites d’estre pendu !
— Ie tiens en trop grant révérence ce dont vous parlez chez ma femme pour le veoir. D’ailleurs, elle est si religieuse de son estoffe, que elle mourroyt plustost que d’en monstrer ung festu.
— Vère, dit le Roy, ce ne est point faict pour estre monstré.
— Vieille cocquedouille, ce estoyt ta femme ! feit le connestable.
— Sire connestable, elle dort, la paouvrette.
— Sus, sus doncques ! A cheval ! Détallons, et si elle est en ta maison, ie ne te donne que cent coups de nerf de bœuf.
Et le connestable, suyvy du prevost, vint au logiz du iusticiard
