Environ la Sainct-Iean, sept années avant de marier le bonhomme Taschereau, elle eut l’aage d’estre aymée. Comme elle estoyt rieuse, elle se laissa aymer sans eslire aulcun des gars qui la poursuyvoyent d’amour. Encores que elle eust à son banc soubz sa croisée le fils à Rabelais, qui avoyt sept bateaulx naviguant en Loire, l’aisné des Iahan, Marchandeau le cousturier et Peccard le dorelotier, elle en faisoyt mille mocqueries, pour ce que elle vouloyt estre menée à l’ecclise paravant de s’enchargier d’ung homme, ce qui prouve que ce feut une garse honneste, tant que sa vertu ne feut point embouzée. Elle estoyt de ces filles qui se guardent moult d’estre contaminées, ains qui, prinses par adventure, laissent aller tout à trac, en ce pensier que, pour une tache ou pour mille, il est tousiours nécessaire de se fourbir. Besoing est d’user d’indulgence à l’encontre de ces charactères.
Ung ieune seigneur de la Court la veit ung iour que elle passoyt l’eaue sur le coup de midy par ung soleil trez ardent qui faisoyt reluire ses amples beaultez, et la voyant demanda quelle estoyt. Ung vieulx homme, qui laboroyt en la grève, luy nomma la belle fille du Portillon, buandière cogneue pour ses bons rires et sa saigesse. Ce ieune seigneur, pourvu de fraizes à empoiser, avoyt force toiles et drapeaux trez-prétieux ; il se résolut à donner la praticque de sa maison à la belle de Portillon, que il arresta au passaige. Il feut mercié par elle et grantement, veu que il estoyt le sire du Fou, chamberlan du Roy. Ceste rencontre feit la belle fille tant heureuse, que elle eut le bec plein de ce nom. Elle en parla moult à ceux de Sainct-Martin, et, au retourner en sa buanderie, en dit ung septier de paroles ; puis, lendemain, en desbagoula tout autant en lavant à l’eaue ; par ainsy il feut plus parlé de mon seigneur du Fou en Portillon que de Dieu au prosne, ce qui estoyt trop.
— Si elle bat ainsy à froid, que fera-t-elle à chauld ? dit ung restant de vieille laveuse ; elle en veult, il luy en cuyra, du Fou !
Pour la prime foys que ceste folle à langue pleine de monsieur du Fou eut à livrer les linges en l’hostel, le chamberlan la voulut veoir et luy chanta laudes et complies sur ses goldronneries, et fina par luy dire que elle n’estoyt point sotte d’estre belle, et, pour ce, la payeroyt lance sur fautre. Le faict
