n’estoyt point péché, quand, de ce, l’on ne tiroyt ni prouffict ni plaizir.
— Il y ha tousiours plaisir ! dit l’abbé. Mais comptez-vous point l’enfant comme ung prouffict ? Ores, boutez en vostre entendement que ce sera tousiours ung péché mortel devant Dieu, et ung crime devant les hommes, que de se greffer ung enfant par l’accointance d’ung homme auquel on n’est pas ecclésiastiquement mariée… Aussy, telles femmes, qui contreviennent aux sainctes lois du mariaige, en reçoivent de grands dommaiges en l’aultre monde, et sont en soubmission de monstres horribles, à griphes aguz et trenchans qui les flambent dedans plusieurs fournaises, en remembrance de ce qu’elles ont icy-bas chauffé leurs cueurs ung peu plus qu’il n’estoyt licite.
Là-dessus, Blanche se gratta l’oreille ; et après avoir pourpensé ung petit, elle dit au prebstre : — Et comment doncques ha faict la vierge Marie ?…
— Ho ! respondit l’abbé, cecy est ung mystère.
— Et qu’est ung mystère ?
— Une chouse qui ne s’explique point et que l’on doibt croire sans examen aulcun.
— Et, vère, feit-elle, ne sauroys-je faire ung mystère ?
— Cettui-cy, dit l’abbé, n’est arrivé qu’une foys, pour ce que c’estoyt le Fils de Dieu.
— Las ! mon père, la voulenté de Dieu est-elle que ie meure ? ou que, de saige et saine compréhension, ie soys brouillée de cervelle ? De ce, il y ha grant dangier. Ores que, en moy, les choses s’esmeuvent et s’entrechauffent, ie ne suis plus en mon sens, ne me soulcie de rien, et, pour aller à homme, saulteroys par-dessus les murs, iroys à travers champs, sans vergongne, et mettroys tout en descombres, pour seulement veoir ce qui ardoyt si fort au moyne des Carneaux. Et, pendant ces raiges qui me labourent et picquotent l’âme et le corps, il n’y ha Dieu, ni diables, ni mary ; ie trespigne, ie cours, ie romproys les buyes, les poteries, l’autrucherie, basse-court, mesnaige et tout, tant que ie ne sçauroys vous dire. Mais ie n’ose vous advouer tous mes meschiefs, pour ce que en en parlant i’en ay l’eaue en la bouche, et la chouse, que Dieu me mauldisse, me desmange trez-bien… Que la follie me happe et me picque, et occise ma vertu. Hein ? Dieu, qui m’aura chevillé ceste grant amour au corps, me damnera-t-il ?…
Sur ce proupos, ce feut le prebstre qui se gratta l’aureille, tout
