ce quy confirma davantage Mr de Guyse en la croyance qu’ayant veillé toute la nuit, il avoit voulu dormir la grasse matinée. Il s’en vint de la en mon logis, et me trouvant encore au lit, me dit : « Je vous prie, prenés vostre robe de chambre, et que je vous die un mot. » Je creus asseurement qu’il me vouloit dire que l’on m’avoit veu sortir de cheux Antragues, et me resolus de nier fermement. Mais luy, au contraire : « Que diriés vous, dit-il, sy le grand escuyer estoit mieux que vous, et que tout le monde, dans l’esprit d’Antragues, et non seulement dans son esprit, mais dans son lit encores ? » Je luy dis que je n’en croyois rien, et que luy, ny elle, n’avoint aucun dessein l’un pour l’autre. « Ô Dieu, dit-il, que les amoureux sont aysés a tromper ! Je l’ai creu comme vous, et cependant il est fort vray qu’il a esté toute cette nuit avec elle, et n’en est sorty qu’a quattre heures du matin : on luy a veu entrer, et mes vallets de chambre mesmes l’en ont veu sortir avesques tant de negligence, qu’il n’a pas seulement voulu prendre un manteau sans croix de l’ordre pour se desguiser. » Et aussy tost appella un des dits vallets, nommé d’Urbal, a quy il demanda devant moy s’il n’avoit pas veu sortir Mr le Grand de cheux Antragues. Il luy respondit : « Ouy, Monseigneur, aussy visiblement que je vois maintenant Mr de Bassompierre que voilla. » Je n’osois regarder au visage ce vallet, quy m’avoit veu le matin mesme sortir de la, et pensois que ce fut une fourbe pour se moquer de moy : mais comme je me tournois d’un autre costé, j’apperceus sur une forme[1] le manteau de Mr le Grand, que mon
- ↑ Banc garni d’étoffe.
