. . . . . .et feus contraint pour joyr d’icelles terres, ayant desja fourny mes deniers, de payer manuellement content es mains du tresorier de vostre espargne la somme de dix neuf mil livres, et d’autant, Sire, que j’ay traicté de bonne foy et que maintenant l’on me veult empescher en la jouissance d’icelles soubz le nom de la royne vostre mere, a quoy je me serois opposé de sorte que nous en aurions esté remis a vostre conseil privé lequel voyant ledit contract estre sy solempnellement faict et promys par Vostre Majesté n’auroient voulu passer oultre, l’ayant remys a Vostre Majesté pour en ordonner ce qui luy plaira ; m’est l’occasion que je suplye tres humblement Vostre Majesté me vouloir maintenir et garder en la jouissance de mondict contract ainsy que me l’avez promys, sy tant n’est qu’il vous plaise me faire faire le remboursement au contenu d’iceluy, et d’aultant que je sçay que Vostre dicte Majesté ne vouldroit en rien contrevenir a sa parolle et a ce qu’elle a une fois promys en l’assemblée de son conseil, me faict asseurer qu’elle me conservera en la jouissance de ces terres selon le contenu de mondict contract auquel je suys entré par l’expres commandement de Vostre dicte Majesté, chose qui m’a de beaucoup mys en arriere pour accommoder l’estat de voz affaires, ayant prins argent a grant interest pour payer mes reystres et qui court encore sur moy. A quoy Vostre Majesté aura esgard sy luy plaist et a la bonne volunté que j’ay tousjours heue a son service et continuer pour n’y espargner ny vye ny biens ; mays me traictant de ceste façon ce me seroit bien oster les moyens. Je suplye le Createur, Sire, de maintenir et garder Vostre Majesté en parfaicte santé, tres bonne, tres longue et tres heureuse vye.
De Haroé, ce xxie janvier 1578.
Tres humble et tres obeissant serviteur a jamais
bassompierre. »
(500 Colb. T. IX. fol. 102).À la suite du traité de Laon, négocié par Christophe de Bassompierre entre Henri IV et le duc de Lorraine, et ratifié à
