estre cent chevaux allors, quy vinsmes a l’hostel de Condé trouver Mr le Prince, ou il demeura une heure. Nous trouvasmes en entrant ce cordonnier quy avoit esté battu de ses gens, quy en avoint esté pendus, lequel sortit en mesme temps pour venir esmouvoir son quartier contre le dit mareschal ; mais il n’en peut venir a bout. On nous dit que nous trouverions, en retournant, le Pont Neuf occupé, et a cette occasion je me mis devant avesques ce que je luy avois ammené d’hommes, et luy me suyvoit a deux cens pas près, voulant (en cas que la partie n’eut esté egale) s’en retourner a l’hostel de Condé, et de là prendre party : mais il ne s’y trouva personne.
Aust. — Peu de jours après Mr le millord de Hay, maintenant comte de Carlile[1], arriva avesques une ambassade magnifique de la part du roy de la Grand Bretaigne, a dessein, ce disoit on, de demander pour le prince de Galles[2] une des filles de France : mais voyant les brouilleries quy suivirent depuis, il s’en desista. Il fut receu avesques toute la somptuosité du monde ; chascun luy fit de grans festins, et en suitte des beaux presens. Il avoit quantité de noblesse angloise avesques luy et entre autres le comte Holland[3] que lors on nommoit Mr Riche, et Gorin[4].
- ↑ L’entrée de l’ambassadeur d’Angleterre eut lieu le 1er aout. Le prince de Joinville, assisté de MM. de Bassompierre, de Rosny, et autres seigneurs, eut la charge de le recevoir.
- ↑ Qui fut depuis Charles Ier.
- ↑ Henri Rich, comte de Holland, second fils de Robert Rich, qui fut créé en 1618 comte de Warwick. Le comte de Holland fut décapité en 1649.
- ↑ William Goring, de Burton, créé baronnet par le roi Jacques II, le 14 mai 1622.
