Le lundy 11me le parlement quy avoit le jour precedent promis au roy d’entretenir pour deux mois a ses despens deux mille six cens hommes de pié, s’estant assemblé pour aviser ou il prendroit l’argent pour cet effet, et en quelle forme, il fut proposé d’envoyer douse conseillers dudit parlement a l’hostel de ville, tant pour donner l’ordre necessaire a la garde de Paris, comme aussy pour avoir l’œil a ce que l'argent que chascun donnoit lors au roy pour lever et entretenir de grandes forces, fut bien employé : a quoy le premier president s’opposa, disant qu’ils n’estoint point assemblés pour cette affaire : mais le president de Mesme[1], par une longue harangue, fit resoudre que l’on en parleroit. Lors le premier president sortit, et Mr le president de Bellievre[2] l'ayant voulu suyvre fut arresté pour tenir le parlement comme second president, lequel en fin, apres avoir promis de rammener le premier president, comme il fit, on laissa sortir ; et estant revenus, l'heure de sortir ayant tost apres sonné, on remit les deliberations au lendemain. Mais des l’apres disner le roy ayant envoyé querir les grands presidens, et premiers presidens et doyens de chaque chambre, il leur fit une rude reprimande et leur deffendit de parler ny se mesler a l’avenir d’autre chose que des proces.
- ↑ Henri de Mesmes, seigneur de Roissy, fils ainé de Jean-Jacques de Mesmes, seigneur de Roissy, conseiller d’État, et d’Antoinette Grossaine. — Cette note, insérée par erreur à la page 71, doit y être remplacée par celle qui se trouve aux Additions et corrections.
- ↑ Nicolas de Bellièvre, seigneur de Grignon, fils de Pomponne de Bellièvre, chancelier de France, et de Marie Prunier, était président au parlement de Paris depuis 1614. Né le 21 août 1583, il mourut le 8 juillet 1650.
