Mars. — Le roy s’achemina au commencement du mois de mars vers Rouan avec quelques forces de pié et de cheval, sur le mescontentement qu’il eut du parlement et de la ville, de ce que le premier avoit absolument refusé la verification de tous les esdits quy luy avoint esté presentés, affin de recouvrer de l'argent pour entretenir les grandes guerres ou le roy estoit embarqué, et la ville avoit refusé de payer emprunt que le roy luy avoit demandé comme a toutes les autres villes de son royaume. Mais comme il y avoit des differens partis tant dans la ville que dans le parlement, et que plusieurs n’estoint point d'avis de ces divers refus, ceux là quy estoint encores dans la bonne grace du roy furent les entremetteurs tant pour appaiser le roy, que pour faire condescendre les autres a obeir a ses commandements, de sorte que le roy ne passa point Dangu[1] : mais il envoya monsieur le chancelier a Rouan pour faire passer ces esdits, et faire payer a la ville laditte contribution ; lequel chancelier fut precedé par les gardes françoises et suisses, et quelques autres regimens que l'on fit entrer dans la ville, et y loger, tant que ledit chancelier y fut ; et aussy on y fit loger douse ou quinse compagnies de cavalerie, apres quoy le roy revint a Paris.
Avril. — Le mois d'avril me fut assés infortuné, outre mes malheurs ordinaires ; car j'eus nouvelles que mon neveu de Bassompierre (quy, outre l’affection naturelle que je luy dois porter, estant ce qu’il
- ↑ Dangu, village du canton de Gisors, arrondissement des Andelys, département de l'Eure.
