XLV.
Description d’un autre espece de Marsouin surnommé une Oudre.
AIant achevé toute l’exterieure anatomie du Daulphin & du Marsouin, avant que proceder a l’interieure partie, il m’a semblé convenable de commencer a descripre, l’exterieure peincture d’une tierce espece de Marsouin, comme i’ay promis : laquelle i’ai faict portraire au naturel, sachãt bien que la peincture peult mieuls representer les choses a l’œil en un instant, que ne font les escripts en longue espace de temps. Elle fut trouvee dedens l’Ocean, & peschee au rivage du Treport, qui est un haure en la coste de Normandie, & fut apporté par charoy a Paris. Ce fut l’un des plus grands poissons que i’eusse onc veu. Ie vueil prendre cestuyci en foy, que touts poissons qui ont quelque similitude avec le Marsouin, soient indifferemment appellez Marsuins. Car encor qu’il fust particulierement nommé de quelques uns du pais une Oudre, si est ce que generalement touts autres en le voiant l’appelloient du Marsuin. On l’envoya du Treport a l’hostel de Nevers a Paris, & ceuls qui l’envoyoient le nommoient du Marsouin, comme nous avons veu par les lettres qu’ils escripvoient au maistre d’hostel, ne usants d’autre nom, sinon qu’ils disoient luy envoyer un Marsouin. Mais ceuls qui l’avoient amené, & plusieurs autres qui le venoient veoir, le nommoient une Oudre, ou un Neutre, les autres une Ouette. Mais pource que Ouette est un nom qui semble estre diminutif d’une Oye, & l’Oye est le nom du Daulphin, il me semble que le nom d’Ouette luy seroit donné mal a propos : car il est quatre ou cinq fois plus grand que n’est le Daulphin. Somme que les appellations les plus communes estoient de la nommer une Oudre, & Oudre en François est a di Uter, qui est une espece de vaisseau a mettre quelque liqueur, soit eau, vin, ou huille, comme sont les boucs, & peauls de chievres, esquelles l’huille nous est apportee en temps de quaresme du Languedoc en France, mais ie l’exposeray cy apres, quant i’auray mis la description de ce poisson.
Et pour commencer a le descripre par sa grandeur, plusieurs iugeoient qu’il estoit pesant de plus de huict cents livres.
