Et nos dieus n’onneurent ne proient,
Ains sont crestien de put lin !
Ostés, pour mon Dieu Apolin !
Sont dont crestïen en ma terre ?
Ont il esmeüe la guerre ?
Sont il si hardi ne si os ?
Rois, tes empires ne teuls os
Ne fu puis que Noeus fist l’arche,
Con est entree en ceste marche.
Par tout keurent ja li fourrier,
Putain et ribaut et houlier
Vont le païs ardant a pourre.
Roys, s’or ne penses de rescourre,
Mis est a perte et a lagan.
A ! fiex a putain, Tervagan,
Avés vous dont souffert tel oeuvre ?
Com je plaing l’or dont je vous cuevre
Che lait visage et che lait cors !
Certes, s’or ne m’aprent mes sors
Les crestïens tous a confondre,
Je vous ferai ardoir et fondre
Et departir entre me gent.
Car vous avés passé argent :
S’estes du plus fin or d’Arrabe.
Senescaus, a poi je n’esrabe,
Et muir de mautalent et d’ire.