Cette page a été validée par deux contributeurs.
68
le jeu de saint nicolas
pincedés
Segneur, or creés m’estoutie !
Prengne chascuns une pugnie
De ches besans : ja n’i parroit !
clikés
Tais te, faus ! Il nous mesquerroit,
S’en porriemes estre repris !
rasoirs
Met le chi, car chi fu il pris,
Si remet l’ymage deseure.
pincedés
Or jus ! Maloite soit li eure
Que je vous encarquai anuit !
clikés
Pinchedé, or ne vous anuit !
Mais creés, si fol con je sui,
Que chascuns voit huimais par lui :
Li quels que soit iert eüreus.
pincedés
Soit, certes !
rasoirs
Soit, si m’aït Dieus !
Car ja mais bien ne nous querroit.
J’ai espiié une paroit
Que j’arai ja mout tost crosee,
Pour le ware d’une espousee
Qu’est en une huche de caisne.
