⸿ Loys par la grace de dieu roy de france Au preuoſt de paris ou a ſon lieutenant / et a tous auſtres iuſticiers ou a leurs lieuxtenant Salut De la partie de noſtre bien ame Galliot du pre marchant libraire demourant a Paris nous a humblement eſte expoſe quil a intencion de brief faire imprimer vng liure des hiſtoires de bretaigne de tous les princes qui ont eſte iuſques au temps du Duc francoys de Bretaigne dernierement faictz a lhõneur et louenge de feue noſtre treſchere et treſamee cõpaigne la royne q̃ dieu abſoulle / mais il doubte quil ne peuſt ou oſſaſt ce faire ſans noz cõge & licẽce. A ceſte cauſe nous a iceluy expoſant fait ſupplier & requerir que noſtre plaiſir ſoit luy permettre ce faire et que inhibitions et deffiences ſoient faitz a tous aultres quelz quilz ſoiẽt de ne les pouoir imprimer iuſques A troys ans prouchaĩs venans a compter du iour & date de ces preſentes a ce que leȣ expoſant puiſſe eſtre recompenſe de ſes paynes labeurs couſtz et miſes quil luy conuiendra faire a faire imprimer et corriger iceulx liures / Requerãt ſur ce luy octroier noz lettres a ce conuenables Pource eſt il que nous ces choſes conſiderees vous cõmandons & cõmettons & a chaſcun de vous ſi cõme a luy appartiendra que vous permettez et ſouffrez audit expoſant & au quel nous auons permis & ſouffert de grace eſpecial par ces pñtes quil puiſſe & luy loyſe faire imprimer touteſfoys que bon luy ſẽblera ledit liure Et a ce faire ſouffrir et obeir contraingnez ou faictes contraindre royaulment et de fait tous ceux quil appartiendra et qui pour ce feront a cõtraindre par toutes voyes & manieres deuez & raiſõnables En faiſant ou faiſant faire ſur ce expreſſe inhibitiõ et deffence de par nous ſur grans peines a nous a appliquer a toutes manieres de gens de quelque eſtat ou condition que ilz ſoient quilz naient a imprimer ou faire imprimer leſȣ liures iuſques a ce que ledit temps de troys ans ſoit expire et passe : et en cas de debat leſȣ inhibitions et deffenſes tenant et a ce cõtraignez tous ceulx qui pour ce feront a contraindre / non obſtant oppoſitions ou appellations quelzcõques faitz ou a faire et ſans preiudice dicelles pour leſquelles ne voulons eſtre differer faicte et adminiſtrez aux parties ouys raiſon et iuſtice / car ainſi nous plaiſt il eſtre faict non obſtant cõe deſſus et lettres ſubreptices a ce contraires. Dõne a paris le. vi. iour de may mil. v. cens & quatorze & de noſtre regne le dixſeptieſme.
Et ſygne Geuffroy.
