Je cui que ne sont mie de ceste terre nez.
Chevaliers et borjois les ont araisonnez :
Estes vous peneant ? ou aves vous esté ?
Signors, ce dit Regnaus, trop l’aves demendé ;
Bien veez que gens somes mont malement menez.
Puis a broichiet Baiart, si les a tous passés.
A pié sont descenduz delez un pin ramé,
Et li .III. compaignons ont les chevaux gardés.
Contremont le palais sont li freres montés.
Li palais est tout vuit, n’i ont crestien trové.
Au doi se sont assis, a la table escoutez,
Il n’en leveront mais, si seront il irés,
Car dus Aymes lor pere en est chassier alés,
Entre lui et ces homes et ces chiens acoplez.
.IIII. cers orent pris, si s’en sont retornés.
Ne sçait mot de ces fiz qui sont en son ostel.
Quant li quens les verra, s’ara le sanc mué.
Encor sieent a table, nus nes i a trové.
Li mengiers n’iere mie encor bien aprestés.
La dame ist de la chambre quant l’uis est deffermez.
Ces filz l’ont esgardee quant il l’ont avisé.
Aalars dist a Regnaut : [Biaus] sire, esgardez,
Veez la nostre mere qui tant nous a amei.
Sires, ce dit Guichars, vous dites vérité.
Biau frere, alez encontre, se il vous vient à gré.
Contes li nos mesaise et nostre povreté.
Non ferons, dit Regnaus, ja ne sera pansé,
Ains attenderons tant qu’elle ait a nous parlé,
Savoir ce nous pourroit de néant raviser.
Or sont li .IIII. freres sus ou palais plenier.
Tant furent nus et povres, n’ont fil de drap entier,
Si sont lais et hideux, bien samblent adversiez,
Les chars orent plus noires que meure de meurier.
La duchesse les voit, n’i ot qu’esmerveillier ;
Tel paour ot la dame qu’a pou ne torne arrier,
Mes or se rasseüre, si les a arainniés :
Barons, dont estes vous, nobiles chevaliers ?
Bien ressemblez hermites ou grans peneanciers.
Se vous volez du nostre, s’en ares volentiers
Page:Castets - La Chanson des quatre fils Aymon, 1909.djvu/184
Cette page a été validée par deux contributeurs.
172
les quatre fils aymon
